रौतहटको गरुडा नगरपालिका–१ जयनगरमा एक महिनादेखि अज्ञात वन्यजन्तुले बाख्राको खोरमा पसेर पशुको ज्यान लिइरहेको छ। पछिल्ला दिनमा ईशनाथ नगरपालिका–१ र ३ तथा दुर्गा भगवती गाउँपालिकाका विभिन्न वडामा पनि यस्तै आक्रमणका घटना भएका छन्।
डिभिजन वन कार्यालय, रौतहटले यो समस्याबारे स्थानीय बासिन्दालाई उच्च सतर्कता अपनाउन आग्रह गरेको छ। कार्यालय प्रमुख मनोजकुमार ठाकुरका अनुसार जयनगरमा वन्यजन्तुले बाख्राको आन्द्राभुँडी निकालेर मार्ने गरेको छ।
वन कार्यालयले वन्यजन्तुको पहिचान र नियन्त्रणका लागि चितवन र पर्सा राष्ट्रिय निकुञ्ज तथा राष्ट्रिय प्रकृति संरक्षण कोषसँग समन्वय गरेको छ। प्राविधिक टोलीले निरन्तर खोज र निगरानी गरिरहे पनि आक्रमणकारी वन्यजन्तुको पहिचान हुन सकेको छैन।
कार्यालयले गरुडा, ईशनाथ, दुर्गा भगवती र आसपासका बासिन्दालाई विशेष सावधानी अपनाउन अनुरोध गरेको छ। साँझ वा रातिको समयमा एक्लै ननिस्कन, बालबालिका र वृद्धवृद्धालाई घरबाहिर नपठाउन, घरपालुवा पशुलाई सुरक्षित खोरमा राख्न, खोर वरिपरि प्रकाशको व्यवस्था गर्न, झाडी र फोहोर सफा राख्न तथा गन्ध आउने फोहोर खुला नराख्न सुझाव दिइएको छ।
वन्यजन्तु देखिएमा नजिक नजाने, लखेट्ने वा समात्ने प्रयास नगर्ने र सुरक्षित स्थानमा गई तत्काल सम्बन्धित निकायलाई खबर गर्न आग्रह गरिएको छ। पशुमाथि आक्रमण भएको अवस्थामा घटनास्थलका पदचिह्न, रगत, कपाल, दिसालगायतका प्रमाण सुरक्षित राखी वन कार्यालयलाई खबर गर्न अनुरोध गरिएको छ।
प्राविधिक टोली फिल्डमा खटिएको छ। अर्को सूचना जारी नभएसम्म स्थानीयलाई उच्च सतर्कता अपनाउन वन कार्यालयले आग्रह गरेको छ। वन्यजन्तु देखिएमा वा कुनै घटना भएमा डिभिजन वन कार्यालय, रौतहट वा सम्बन्धित सुरक्षा निकायलाई तत्काल जानकारी गराउन अनुरोध गरिएको छ।
