राष्ट्रिय स्वतन्त्र पार्टी (रास्वपा) का सभापति रवि लामिछाने नेतृत्वको प्रतिनिधिमण्डलले आज भारतीय गृहमन्त्री अमित शाहसँग उच्चस्तरीय भेटवार्ता गर्दैछ।
नयाँ दिल्लीमा हुने भेटमा नेपाल–भारत सम्बन्धका विविध आयाम, आपसी हितका साझा एजेन्डाहरू र समसामयिक राजनीतिक विषयमा छलफल हुनेछ।
भारतीय जनता पार्टी (भाजपा) को निमन्त्रणामा भारत पुगेका लामिछानेले यसअघि दिल्लीमा विभिन्न राजनीतिक भेटघाट गरिसकेका छन्।
भेटका क्रममा दुई देशबीचको ऐतिहासिक सम्बन्ध प्रगाढ बनाउने, लोकतान्त्रिक अभ्यास सुदृढीकरण, सुरक्षा सहकार्य र राजनीतिक दलहरूबीच संस्थागत संवाद प्रभावकारी बनाउने विषयमा विचार विमर्श हुनेछ।
यस भेटलाई दुई देशबीचको राजनीतिक तथा संस्थागत सम्बन्ध सुदृढ बनाउने महत्त्वपूर्ण अवसरका रूपमा हेरिएको छ। प्रतिनिधिमण्डलले भ्रमणका क्रममा भारतीय राजनीतिक नेतृत्व, पार्टी पदाधिकारी र अन्य सरोकारवालासँग समेत भेट गर्ने कार्यक्रम छ।
