सुनसरी । सप्तकोशी नदीमा जलसतह निरन्तर बढेपछि कोशी ब्यारेजका २२ वटा ढोका खोलिएका छन् ।
आइतबार साँझ ६ बजे प्रतिसेकेन्ड एक लाख ८४ हजार ७८५ क्युसेक पानीको प्रवाह थियो । सोही कारण २१ ढोका खोलिएका थिए । बेलुका ८ बजे पानीको बहाव बढेर प्रतिसेकेन्ड एक लाख ९२ हजार ५३५ क्युसेक पुगेपछि २२ ढोका खोलिएको जिल्ला प्रहरी कार्यालयका सूचना अधिकारी चन्द्रबहादुर खड्काले जानकारी दिए ।
कोशी ब्यारेजमा पानीको प्रवाह एक लाख ५० हजार क्युसेक नाघे खतराको सङ्केत स्वरूप पश्चिमतर्फ रातो बत्ती बाल्ने गरिन्छ ।
हाल डुबानको प्रत्यक्ष जोखिम छैन । तर दिउँसोदेखि जलसतह बढिरहेकाले सम्बन्धित निकाय र सप्तकोशी आसपासका बासिन्दालाई सतर्क रहन सूचना अधिकारी खड्काले आग्रह गरे ।
तटीय क्षेत्रका नागरिकलाई सुरक्षित स्थानमा रहन भनिएको छ । कोशी नदीमा माछा मार्ने र दाउरा सङ्कलन नगर्न जिल्ला प्रहरी कार्यालय सुनसरीले सूचनामार्फत आग्रह गरेको छ ।
