कोशी ब्यारेजका ३१ ढोका बुधबार रातिदेखि परेको अविरल वर्षाले सप्तकोशी नदीमा जलसतह बढेपछि खोलिएका छन्।
आज बिहान १० बजे प्रतिसेकेन्ड १,९८,२२० क्युसेक बहाव हुँदा २५ ढोका खोलिएका थिए। दिउँसो १ बजे बहाव २,२९,९६० क्युसेक पुगेपछि ३० ढोका खोलिए।
दिउँसो २ बजे बहाव २,४०,५५५ क्युसेक पुगेपछि ३१ ढोका खोलिएको जिल्ला प्रहरी कार्यालयका सूचना अधिकारी चन्द्रबहादुर खड्काले बताए। कोशी ब्यारेजमा १,५०,००० क्युसेक नाघेपछि जोखिमको सङ्केतस्वरूप पश्चिमतर्फ रातो बत्ती बाल्ने गरिन्छ।
जलसतह निरन्तर बढिरहेकाले सप्तकोशी आसपासका बासिन्दालाई सतर्कता अपनाउन र जोखिमपूर्ण क्षेत्रमा नजान खड्काले आग्रह गरे। तटीय क्षेत्रका नागरिकलाई सुरक्षित स्थानमा रहन र नदीमा माछा मार्ने वा दाउरा सङ्कलन नगर्न जिल्ला प्रशासन कार्यालयले निर्देशन दिएको छ।
वर्षा जारी रहेकाले नदीमा पानीको बहाव बढिरहेको छ। कोशी ब्यारेजमा ५२ मूल र ४ नहर गरी जम्मा ५६ ढोका छन्।
