सिरहा । सशस्त्र प्रहरीले पछिल्लो तीन दिनको अवधिमा ३४ लाख रुपैयाँभन्दा बढी मूल्यका विभिन्न सामान बरामद गरेको छ। सीमा क्षेत्रबाट भारततर्फ र नेपालतर्फ ओसारपोसार भइरहेको अवस्थामा कस्मेटिक, किराना, पित्तलको भाडा, मदिरा र इलेक्ट्रोनिक सामान नियन्त्रणमा लिइएको हो।
सशस्त्र प्रहरी नम्बर ७ हेडक्वाटर सिरहाका प्रमुख सुमन जंग थापाका अनुसार सोमबार मात्रै १४ लाख ३ हजार ३२६ रुपैयाँ बराबरको सामान बरामद गरिएको छ। यसमा कस्मेटिक, मदिरा, इलेक्ट्रोनिक सामान र डिजेलजस्ता सामग्री समावेश छन्।
यस्तै, असार १९ गते ११ लाख १० हजार ४२५ रुपैयाँ र असार १८ गते ९ लाख २६ हजार ८५० रुपैयाँ बराबरको भन्सार छलीका सामान बरामद गरिएको थियो।
नियमित गस्ती र अनुगमनका क्रममा सीमा क्षेत्रबाट यस्ता सामग्री बरामद हुने गरेको सशस्त्र प्रहरीले जनाएको छ। बरामद गरिएका सबै सामान आवश्यक कारबाहीका लागि सिरहास्थित सखुवा नजिकको भन्सार कार्यालय माडरमा बुझाइएको छ।
