काभ्रेपलाञ्चोक र सिन्धुपाल्चोक जोड्ने चेहेरेस्थित सुनकोशी नदीमा निर्माणाधीन पक्की पुल ६ वर्षदेखि अलपत्र छ। निर्माण व्यवसायीले तोकिएको समयमा काम सम्पन्न नगर्दा पुल निर्माण ठप्प छ।
कोशीपूर्वस्थित भुम्लु गाउँपालिकाका विभिन्न वडामा सडक सञ्जाल पुर्याउने उद्देश्यले २०७७ भदौमा पुल निर्माण सम्झौता भएको थियो। सडक विभाग र अमर कन्स्ट्रक्सनबीच २०७७ साल भदौ १० गते सम्झौता भएको थियो। निर्धारित समयमा काम सम्पन्न नहुँदा भुम्लु गाउँपालिकाका नागरिकले दैनिक सास्ती खेपिरहेका छन्।
भुम्लु गाउँपालिकाका अध्यक्ष गणेशबहादुर लामाले निर्माण व्यवसायीले काम रोकेको बताए। उनले स्थानीयलाई उपभोग्य सामान ढुवानी, विद्यार्थीको विद्यालय यात्रा र बिरामीको अस्पताल लैजान कठिनाई भएको बताए। लामाले सडक विभागलाई तत्काल काम सुचारु गराउन आग्रह गर्दा सुनुवाइ नभएको गुनासो गरे।
सडक विभागले निर्माण व्यवसायी अमर कन्स्ट्रक्सनलाई पटकपटक ताकेता गर्दा पनि काम अघि नबढेको जनाएको छ। विभागका अनुसार, सम्झौता अवधि सकिएपछि थपिएको म्याद पनि सकिन लागेको छ। अब कानुनी प्रक्रिया अघि बढाउने तयारी भइरहेको छ।
