काठमाडौंमा रहेका भारतीय विदेश सचिव विक्रम मिश्रीले आज (कात्तिक १९ गते) प्रधानमन्त्री बालेन्द्र शाहसँग शिष्टाचार भेटवार्ता गरी अपराह्न स्वदेश फर्किँदैछन्। प्रधानमन्त्री शाहको आसन्न भारत भ्रमणको तयारीका लागि मिश्री दुईदिने नेपाल भ्रमणमा आएका हुन्।
मिश्रीको यो भ्रमणलाई नेपाल-भारत सम्बन्धमा उच्चस्तरीय संवादको निरन्तरता र प्रधानमन्त्री शाहको भारत भ्रमणलाई सफल बनाउन दुवै देशले दिएको विशेष चासोको संकेतका रूपमा हेरिएको छ। केही महिनाअघि प्रधानमन्त्री शाहले भेटघाटको समय नमिलाउँदा मिश्रीको भ्रमण स्थगित भएको थियो।
उच्चस्तरीय भेटघाट
काठमाडौं आइपुगेलगत्तै मिश्रीले उच्चस्तरीय भेटघाटमा व्यस्त भएका थिए। उनले हिजो (कात्तिक १८ गते) अर्थमन्त्री डा. स्वर्णिम वाग्ले, परराष्ट्रमन्त्री शिशिर खनाल, ऊर्जामन्त्री विराजभक्त श्रेष्ठ, पूर्वाधार विकास मन्त्री सुनिल लम्साल र परराष्ट्र सचिव अमृतबहादुर राईसँग अलग–अलग भेटवार्ता गरेका थिए। यी भेटघाटले प्रधानमन्त्री शाहको भारत भ्रमणका एजेन्डा र द्विपक्षीय सम्बन्धका विविध पक्षमा छलफल केन्द्रित गरेको परराष्ट्र मन्त्रालय स्रोतले जनाएको छ।
प्रधानमन्त्रीको भारत भ्रमणको तयारी
नेपाल र भारतका अधिकारीहरूले प्रधानमन्त्री बालेन्द्र शाहको भारत भ्रमण आगामी मंसिरको दोस्रो साता गर्ने गरी तयारी गरिरहेका छन्। परराष्ट्र मन्त्रालय स्रोतका अनुसार, प्रधानमन्त्री शाहको भारत भ्रमणको औपचारिक मिति ‘छिट्टै’ सार्वजनिक गर्ने तयारी भइरहेको छ।
भारतीय विदेश मन्त्रालयका प्रवक्ता रणधीर जयसवालले गत कात्तिक ११ गते नै नेपालका प्रधानमन्त्रीलाई भारत भ्रमणको निमन्त्रणा गरिसकेको जानकारी नियमित पत्रकार भेटघाटमा दिएका थिए। यसैको तयारीका लागि नेपालका लागि नवनियुक्त भारतीय राजदूत सुधाकर दलेला पनि मंगलबार (कात्तिक १७ गते) काठमाडौं आइपुगेका थिए।
भारतीय विदेश सचिव विक्रम मिश्रीको यो भ्रमणपछि नै प्रधानमन्त्री शाहको भारत भ्रमणको औपचारिक मिति सार्वजनिक हुनसक्ने परराष्ट्र मन्त्रालयका अधिकारीहरूले जनाएका छन्।
