प्रधानमन्त्रीले ‘भिजिट भिसा’को दुरुपयोग रोक्न कडा निर्देशन दिएका छन्। प्रतिनिधिसभा बैठकमा सांसद खुश्बु ओलीको प्रश्नको जवाफ दिँदै उनले यस्तो बताएका हुन्।
‘भिजिट भिसा’मा गएर कामको अनुमति पाएपछि कामदार भिसा लिन नेपाल आउनुपर्ने बाध्यता अन्त्य गर्न विदेशमै बसेर भिसा कन्भर्ट गर्ने विकल्पमा श्रम मन्त्रालयले काम गरिरहेको प्रधानमन्त्रीले अवगत गराए।
बजेटमार्फत मासिक ५० युनिटभन्दा बढी विद्युत् खपत गर्ने उपभोक्तालाई ५ प्रतिशत मूल्य अभिवृद्धि कर (भ्याट) लगाउने व्यवस्थाबारे प्रधानमन्त्रीले विद्युत् प्रणालीको क्षमता अभिवृद्धि गर्न यो कर लगाइएको स्पष्ट पारे।
“तुरुन्तै विद्युतीय युगमा जान सकिने अवस्था छैन। देशका हरेक भान्छामा बिजुलीबाट खाना बनाउने हो भने, देशका सबै ट्रान्सफर्मर र सवस्टेसनको क्षमताले धान्दैन”, उनले भने।
उनले क्षमता विकासका लागि पैसा आवश्यक रहेको र त्यसकै लागि ५० युनिटभन्दा माथिको विद्युत् खपतमा पाँच प्रतिशत भ्याट लगाइएको जिकिर गरे। उठेको रकम देशभरका ट्रान्सफर्मर, प्रशारणलाइन र सबस्टेसनको सुधारमा प्रयोग गरिने उनले बताए।
