खाद्य प्रविधि तथा गुण नियन्त्रण विभागले ‘म्याग्नेसियम ग्लाइसिनेट’ युक्त कुनै पनि आहारपूरक खाद्य पदार्थको बिक्री–वितरणमा रोक लगाएको छ। विभागले यस्ता उत्पादन दर्ता नगरी बिक्री गरेमा कडा कारबाही गर्ने चेतावनी दिएको छ।
विभागले सामाजिक सञ्जालमा ‘म्याग्नेसियम ग्लाइसिनेट’ बारे भ्रमपूर्ण विज्ञापन आइरहेको जनाएको छ। ‘खाद्य स्वच्छता तथा गुणस्तर ऐन, २०८१’ र ‘आहारपूरक खाद्य पदार्थ नियमन कार्यविधि, २०७२’ अनुसार स्वास्थ्यसम्बन्धी पूरक उत्पादन बिक्रीअघि विभागमा दर्ता अनिवार्य छ।
विभागका अनुसार ‘म्याग्नेसियम ग्लाइसिनेट’ मोलिक्युल भएका कुनै पनि उत्पादनलाई आहारपूरक खाद्य पदार्थका रूपमा दर्ता वा बिक्री–वितरणको अनुमति दिइएको छैन। दर्ता नभएका उत्पादन बिक्री गरेको पाइएमा ऐनअनुसार कारबाही हुनेछ।
विभागले उपभोक्तालाई अनुमति नपाएका र प्रमाणित नभएका पूरक खाद्य पदार्थ प्रयोग गर्दा सचेत रहन आग्रह गरेको छ।
