काठमाडौं महानगरपालिकाले गोरखा मिडिया नेटवर्क प्रालिद्वारा सञ्चालित ग्यालेक्सी ४के टेलिभिजनलाई १५ दिनभित्र घरधनीलाई बुझाउनुपर्ने बहाल रकम बुझाई सामान लैजान अन्तिम सूचना जारी गरेको छ। तोकिएको समयभित्र सामान नहटाए लिलाम प्रक्रिया अगाडि बढाउने चेतावनी महानगरले दिएको छ।
महानगरपालिका–३ स्थित घरधनी मृगेन्द्रप्रसाद मिश्रले गोरखा मिडिया नेटवर्कका अध्यक्ष गितेन्द्रबाबु (जीबी) राईविरुद्ध घरजग्गा खाली गराई भाडा असुल गरिपाऊँ भनी मुद्दा दायर गरेका थिए। उक्त मुद्दामा महानगरको न्यायिक समितिले २०८१ साल कात्तिकमा घरजग्गा खाली गराउने र बहाल रकम तथा बहाल कर गोरखा मिडियाबाट भराउने निर्णय गरेको थियो।
महानगरको न्यायिक समितिको निर्णय कार्यान्वयन नभएपछि उच्च अदालत पाटनले २०८२ साल साउन २८ गते दुई महिनाभित्र निर्णय कार्यान्वयन गर्न महानगरको नाममा परमादेश जारी गरेको थियो। अदालतको आदेशपछि २०८२ साल कात्तिक १४ गते महानगरले घरजग्गा खाली गराए पनि ग्यालेक्सी ४के टेलिभिजनका सरसामानहरू सोही स्थानमा छन्।
अदालतको आदेशपछि पनि सरसामान नहटाइएपछि घरधनी मिश्रले गत वैशाख २१ गते सामानहरू लिलाम गरिपाऊँ भनी महानगरमा निवेदन दिएका थिए। सोही निवेदनका आधारमा महानगरले अन्तिम सूचना सार्वजनिक गरेको हो।
तोकिएको १५ दिनको समयमा पनि सामान नहटाए काठमाडौं महानगरपालिका विवाद निरुपण (कार्यविधि) ऐन, २०७५ को दफा ७० बमोजिम सामानहरू लिलाम गरिने महानगरले जनाएको छ।
गोरखा मिडिया नेटवर्क प्रालिद्वारा सञ्चालित ग्यालेक्सी ४के टेलिभिजन लामो समयदेखि बन्द छ। सहकारी ठगी प्रकरणमा मुछिएका अध्यक्ष जीबी राई फरार छन्।
