महोत्तरीको सोनमा गाउँपालिका–३ खखनामा मंगलबार राति चोरी गर्न पसेको समूहमाथि प्रतिवाद गर्दा गोली चल्दा २७ वर्षीय रामईश्वर यादव र उनकी २२ वर्षीया श्रीमती किरण यादव घाइते भएका छन्। ५/६ जनाको समूहले घरभित्र पसेर चोरी गर्ने प्रयास गरेको थियो।
प्रतिवाद गर्ने क्रममा समूहले गोली चलाएको जिल्ला प्रहरी कार्यालय महोत्तरीले जनाएको छ। दुवै घाइतेको जनकपुरस्थित जानकी हेल्थ केयरमा उपचार भइरहेको छ। प्रहरीले घटनाबारे बिहान जानकारी पाएको र थप अनुसन्धान गरिरहेको बताएको छ।
