महोत्तरीको सोनमा गाउँपालिका ३ खखना दक्षिणबारी टोलमा गएराति डाका समूहले गोली चलाउँदा एक दम्पती घाइते भएका छन्। स्थानीय रामविश्वास यादवको घरमा लुटपाट गर्न पसेका डाकालाई प्रतिकार गर्दा उनीहरूमाथि गोली प्रहार भएको थियो।
प्रहरीका अनुसार २७ वर्षीय ईश्वर यादव र उनकी २२ वर्षीया श्रीमती किरण यादवलाई गोली लागेको छ। उनीहरूको अवस्था गम्भीर छ। थप उपचारका लागि जनकपुर पठाइएको महोत्तरीका प्रहरी नायब उपरीक्षक पंचलाल गोले जानकारी दिए। घटना स्थलबाट गोलीको खोका बरामद भएको छ। फरार डाकाहरूको खोजी तीव्र पारिएको छ।
यसैबीच, गत आइतबार रौतहटको दुर्गा भगवती गाउँपालिका ४ स्थित झाँझ पुल नजिक विद्युत प्राधिकरणका कर्मचारी पंकज कुमार यादव हतियारधारी समूहको लुटपाटमा परेका छन्। ड्युटी सकेर घर फर्किँदै गरेका यादवमाथि आक्रमण गरी उनको ना २९ प २९३२ नम्बरको मोटरसाइकल लुटेको प्रहरीले जनाएको छ।
पछिल्लो समय मधेसका जिल्लाहरूमा डकैती र लुटपाटजस्ता घटनामा वृद्धि भएको छ। सुरक्षाकर्मीहरूको गस्तीमा कमी आएपछि सामाजिक अपराध बढेको विश्लेषण गरिएको छ। यी घटनाहरूले मधेस प्रदेशमा सुरक्षा अवस्था कमजोर बन्दै गएकोतर्फ संकेत गरेका छन्।
