साउदी अरब जाने नेपाली श्रमिकले अब अनिवार्य सीप परीक्षण उत्तीर्ण गर्नुपर्ने भएको छ। साउदी सरकारको स्किल भेरिफिकेसन प्रोग्राम लागू भएपछि बुधबारदेखि प्रमाणीकरण नभएका श्रमिकले श्रम स्वीकृति पाउने छैनन्।
साउदीको मानव संशाधन तथा सामाजिक विकास मन्त्रालयले दक्ष श्रमिकको व्यावसायिक मापदण्ड सुनिश्चित गर्न यो नियम ल्याएको हो।
श्रमिकले १०० अमेरिकी डलर (करिब १५ हजार रुपैयाँ) शुल्क बुझाउनुपर्नेछ। यसमा ५० डलर परीक्षा र ५० डलर पूर्वसिकाइ मान्यता शुल्क समावेश छ।
प्रोफेसनल भेरिफिकेसन पोर्टलमा विवरण दर्ता गरी पेसाअनुसार सैद्धान्तिक र प्रयोगात्मक परीक्षा दिनुपर्नेछ।
उत्तीर्ण भएपछि व्यावसायिक मान्यता प्रमाणपत्र पाइनेछ। यो साउदी भिसा प्रक्रियाका लागि मोफा प्रणालीमा एकीकृत हुनेछ।
हाल निर्माण, लोड–अनलोड, भरिया र ठेला चलाउने पाँच पेसामा यो नियम लागू छ। साउदी सरकारले यसलाई अन्य पेसामा पनि विस्तार गर्नेछ।
