वीरगन्जको नारायणी अस्पतालमा उपचारका क्रममा दुई बिरामीको मृत्यु भएपछि शनिबार अस्पतालमा तोडफोड र प्रदर्शन भयो। चिकित्सकको लापरबाहीले ज्यान गएको भन्दै मृतकका आफन्तले प्रदर्शन गर्दा स्थिति तनावग्रस्त बनेको थियो।
तनाव साम्य पार्न र दोषीमाथि कारबाही गर्न पाँच बुँदे सहमति भयो। वीरगन्ज महानगरपालिका वडा नं. २५ का अध्यक्ष आशुतोष चतुर्वेदीका अनुसार ड्युटीमा रहेका २ डाक्टर र ३ कर्मचारीसहित ५ जनालाई जिम्मेवारीबाट हटाउने सहमति भएको छ।
पर्साका सहायक प्रमुख जिल्ला अधिकारी कृष्ण थापा, नारायणी अस्पतालका मेडिकल सुपरिटेन्डेन्ट डा. चितरञ्जन साह, वडा अध्यक्ष चतुर्वेदी, सुरक्षा निकायका प्रतिनिधि र मृतकका आफन्तबीच छानबिन र कारबाही गर्ने सहमति भएको हो।
छाती दुख्ने समस्या देखिएपछि वीरगन्ज–२५ का राजकुमार पटेल शनिबार बिहान नारायणी अस्पताल भर्ना भएका थिए। बिहान ११:३० बजे डाक्टरले मृत घोषणा गरेपछि आफन्त आक्रोशित बने।
आक्रोशित आफन्तले अस्पतालमा तोडफोड र चिकित्सकमाथि हातपातको प्रयास गरे। वडा प्रहरी कार्यालय बिर्ताले सामान्य बल प्रयोग गरी स्थिति नियन्त्रणमा लियो।
पर्साको जगरनाथपुर–६ निवासी राजेश यादवको पनि शनिबार दिउँसो २ बजे मृत्यु भयो। मेडिकल वार्डबाट आईसीयू सार्ने क्रममा अक्सिजन नलगाएर लापरबाही भएको भन्दै आफन्त प्रदर्शनमा उत्रिए। पर्सा प्रहरीले लाठीचार्ज गरेर स्थिति नियन्त्रणमा लियो।
मृतकका भतिजा विकास पटेलले छातीमा असह्य पीडापछि राजकुमारलाई अस्पताल ल्याइएको बताए। चिकित्सकले औषधि लेखिदिए पनि इसिजी (ECG) उपकरण र अन्य अत्यावश्यक सामग्री नभएको उनको आरोप छ। सामान्य औषधि पनि सहज नपाउँदा बिरामीको ज्यान गएको उनको दाबी छ।
घटनाका क्रममा स्थानीय बिटमा खटिएका एक प्रहरीमाथि हातपात भएको थियो। प्रहरीले सो आरोपमा एक जनालाई नियन्त्रणमा लिएको छ।
अस्पताल प्रशासनले घटनाबारे औपचारिक प्रतिक्रिया दिएको छैन। मृतकका आफन्तले उपचारमा गम्भीर लापरबाही भएको दाबी गर्दै निष्पक्ष छानबिन, सत्यतथ्य सार्वजनिक र दोषीमाथि कारबाहीको माग गरेका छन्। यस घटनाले सरकारी अस्पतालको स्वास्थ्य सेवा र आकस्मिक व्यवस्थापनमा प्रश्न खडा गरेको छ।
