जनकपुरधाम । धनुषाको ढल्केवरमा प्रहरीले गोली चलाएर ९५ ग्राम खैरो हेरोइनसहित दुई भारतीय कारोबारी सन्तोषकुमार महतो र मिथिलेश साहुलाई पक्राउ गर्यो। शुक्रबार दिउँसो बसही खोलाको पुल नजिक गोप्य सूचनाको आधारमा पुगेको प्रहरी टोलीमाथि उनीहरू भाग्न खोजेपछि गोली चलाइएको थियो।
यसअघि बिहीबार सिरहाको लहान नगरपालिका–३ अस्पताल चोकमा प्रहरीले गोली चलाएर ६ जनालाई नियन्त्रणमा लियो। २४३ ग्राम ब्राउन सुगरसहित पक्राउ गर्दा मो. नसिर र विद्यानन्द यादव घाइते भए। प्रहरीले ७ राउन्ड गोली प्रहार गरेको थियो।
त्यस्तै, बुधबार अपराह्न लहान नगरपालिका–३ नयाँ बस्ती टोलमा नास्पातीका क्रेटभित्र लुकाइएको ६५२ किलो गाँजासहित तीन जना पक्राउ परे। प्रहरीले ९ हजार ९२० केजी नास्पातीसमेत नियन्त्रणमा लियो।
सोही राति तिलाठी कोइलाडी गाउँपालिका–५ बाट प्रहरीले ३ हजार ३३२ किलो गाँजा बरामद गर्यो। प्रहरीले जिप र दुई पिकअप नियन्त्रणमा लिए पनि चालकहरू फरार भए।
सिरहाका प्रहरी प्रवक्ता डीएसपी रमेशबहादुर पालका अनुसार लहान क्षेत्र लागुऔषध कारोबारको इपिसेन्टर बन्दै गएको छ। खुला सीमाका कारण भारतीय कारोबारीहरूको गतिविधि बढेको छ। प्रहरीमाथि प्रतिकार गर्ने प्रयास भएपछि गोली प्रहार गरेर पनि कारोबारी समात्न थालिएको छ।
मधेश प्रदेश प्रहरी कार्यालयका अनुसार आर्थिक वर्ष २०८२/०८३ मा सिरहामा मात्र १९७ जना लागुऔषधसहित पक्राउ परे। गत आर्थिक वर्षमा ८ जिल्लाबाट ८७१ जना पक्राउ परेका थिए।
प्रहरीले गत आर्थिक वर्षमा गाँजा १५ हजार ३८२ किलो, ब्राउन सुगर ५१६ ग्राम, चरेस २७२ किलो, अफिम ३ किलो, हेरोइन २ हजार ८३१ ग्राम बरामद गर्यो। यस्तै, ४ लाख ७३ हजार ४८५ वटा ट्याब्लेट, २ हजार ११८ बोतल सिरप र १८ हजार १२५ इन्जेक्सन बरामद भएका छन्।
मधेश प्रदेश प्रहरी कार्यालयका प्रवक्ता एसएसपी प्रभुप्रसाद ढकालका अनुसार खुला सीमा, दुर्गम क्षेत्रमा हुने गाँजा उत्पादन र सीमावर्ती क्षेत्रमा सुरक्षाकर्मीको उपस्थिति नभएका ठाउँबाट कारोबारीको आवतजावतले लागुऔषध नियन्त्रणमा चुनौती थपेको छ।
पछिल्लो समय बालबालिका, किशोरकिशोरी तथा युवाहरू लागुऔषधको लतमा फस्दै गएका छन्। यसले समाजमा जघन्य अपराधका घटना बढाएको छ। प्रहरीले स्कुल, टोल, युवा र अभिभावकसँग सचेतना कार्यक्रमहरू सञ्चालन गरिरहेको छ।
