वीरगन्ज नाकाबाट साउन महिनामा ११,७१५ टन युरिया र डीएपी मल भित्रिएको छ। धान रोपाइँ तथा बाली व्यवस्थापनका लागि रासायनिक मलको माग बढिरहेका बेला यो परिमाणको मल आइपुगेको हो।
कृषि सामग्री कम्पनी लिमिटेडको वीरगन्ज प्रादेशिक कार्यालयका सूचना अधिकारी दिनेश शर्माका अनुसार तीनवटा कन्साइन्मेन्टमार्फत मल वीरगन्ज आइपुगेको हो। कन्साइन्मेन्ट नम्बर १५४ अन्तर्गत ५,४३१ टन डीएपी मल वीरगन्जस्थित कम्पनीको गोदाममा भण्डारण गरिएको छ।
भारतको इन्डियन पोटास लिमिटेड (आईपीएल)ले तेस्रो मुलुकबाट ल्याएको उक्त डीएपी वीरगन्ज नाकाबाट नेपाल भित्रिएको हो।
यसैगरी, कन्साइन्मेन्ट नम्बर १५५ अन्तर्गत ५,१११ टन युरिया मल पनि वीरगन्ज आइपुगेको छ। आदित्य बिर्ला कम्पनीले ग्लोबल टेन्डरमार्फत यो मल आपूर्ति गरेको हो।
कन्साइन्मेन्ट नम्बर १५३ अन्तर्गत सन इन्टरनेसनल कम्पनीले ल्याएको १,१७३ टन युरिया पनि वीरगन्जस्थित कृषि सामग्री कम्पनीको गोदाममा भण्डारण भइसकेको छ।
यी तीनवटै कन्साइन्मेन्टबाट हालसम्म ११,७१५ टन मल नेपाल भित्रिएको हो। कम्पनीका अनुसार प्रत्येक कन्साइन्मेन्टबाट थप ३०–३० हजार टन मल ल्याउने तयारी भइरहेको छ।
शर्माका अनुसार मल बोकेका रेल्वे र्याक भारतको सीमावर्ती सहर रक्सौलस्थित रेल्वे स्टेसन र वीरगन्जको सिर्सिया सुक्खा बन्दरगाहमा आइरहेका छन्। बाँकी मल पनि क्रमशः वीरगन्ज ल्याउने प्रक्रिया जारी छ।
वीरगन्ज नाकाबाट भित्रिने मल कृषि सामग्री कम्पनीका वीरगन्ज, भैरहवा र विराटनगरस्थित प्रादेशिक कार्यालयमा वितरण गरिनेछ। भैरहवा प्रादेशिक कार्यालयको कोटामा पर्ने अधिकांश मलसमेत वीरगन्ज नाकाबाटै नेपाल भित्रिन्छ।
धान रोपाइँको मुख्य समयमा किसानले आवश्यकताअनुसार मल नपाएको गुनासो गरिरहेका बेला नयाँ खेप भित्रिन थालेपछि आपूर्ति सहज हुने अपेक्षा गरिएको छ। मलको अभावका कारण किसान समस्यामा परिरहेका अवस्थामा ठूलो परिमाणमा युरिया र डीएपी आउन थालेकाले केही हदसम्म राहत पुग्ने शर्माले बताए।
कृषि सामग्री कम्पनीले आगामी दिनमा थप मल भित्र्याउने तयारी गरिरहेकाले आपूर्ति बढ्दै जाँदा बजारमा देखिएको अभाव क्रमशः कम हुने अपेक्षा छ।
