बारा जिल्लाको सिमरामा तीन वर्षीया बालिकामाथि भएको जघन्य अपराधका दोषीलाई कडा कारबाही गर्न माग गरिएको छ। बुधबार बसेको प्रतिनिधिसभा बैठकमा सांसदहरुले उक्त घटनामा प्रहरी प्रशासनको समेत कमजोरी देखिएको भन्दै छानबिन गरी दोषीलाई कारबाही गर्न आवाज उठाएका हुन्।
राष्ट्रिय स्वतन्त्र पार्टीका सांसद रहबर अन्सारीले बालिका हराएको जानकारी पाएको २४ घण्टासम्म पनि इलाका प्रहरी कार्यालय सिमराबाट कुनै खोजी वा कारबाही अघि नबढेकोमा असन्तुष्टि जनाए। उनले घटना दर्ता भएपछि प्रहरीले चालेका कदमको ’एक्सन लग’ सार्वजनिक गर्नुपर्ने र दोषी प्रहरी अधिकारीमाथि कारबाही हुनुपर्ने माग गरे। सीमावर्ती क्षेत्रमा हुने अवैध गतिविधि नियन्त्रण र यस्ता अपराध रोक्न गृह मन्त्रालयलाई तत्काल गम्भीर हुन पनि उनले आग्रह गरे।
अन्य सांसदहरूले पनि घटनाका दोषीलाई कडा कारबाहीको माग गरेका छन्। प्रारम्भिक अनुसन्धान अनुसार, जितपुरसिमरा–१ दसधुरीकी मनमती चौधरीकी तीन वर्षीया छोरी गरिमा चौधरी साउन ३१ गते बिहान घरबाट हराएकी थिइन्। उनको शव मंगलबार एक घरको खाली कोठामा फेला परेको थियो।
प्रारम्भिक अनुसन्धानमा १६ वर्षीय सुमन थापा र प्रोगेस चौधरी पक्राउ परेका छन्। उनीहरू म्याजिक चलाउने सवारी चालक तथा सहचालक रहेको र थापाले चकलेटको प्रलोभन देखाएर बालिकालाई सुनसान घरमा लगेर बलात्कारपछि हत्या गरेको बयान दिएका छन्। साउन ३१ गते बेपत्ता भएकी बालिकाको शव परीक्षणका लागि प्रादेशिक अस्पताल कलैयामा राखिएको छ।
घटनाको विरोधमा स्थानीयले बुधबार बिहानैदेखि पथलैया–वीरगन्ज सडकखण्डमा टायर बालेर प्रदर्शन गरेका छन्। उनीहरूले दोषीमाथि कडा कारबाहीको माग राखेका छन्।
