राष्ट्रिय स्वतन्त्र पार्टी (रास्वपा) को मधेस प्रदेश अधिवेशन महाधिवेशन सम्पन्न भएको दुई महिना बितिसक्दा पनि अनिश्चित छ। पार्टीभित्रको आन्तरिक विवाद, निर्वाचित सांसदहरूको हस्तक्षेप र जातीय समूहको दबाबले अधिवेशन प्रक्रिया ठप्प भएको छ।
दसैँअघि अधिवेशन सम्पन्न गर्ने पार्टीको योजना भए पनि केन्द्रीय निर्वाचन आयोगले तयारी थाल्न सकेको छैन। आयोगका उपप्रमुख राम गुरुङले मधेस प्रदेशको अवस्था फरक भएकाले अधिवेशन गराउन पार्टी नेतृत्वसँग छलफल भइरहेको बताए। ‘अझै दुई महिना समय छ, तर अहिलेसम्म सञ्चार माध्यममा सूचना दिने गरी ठोस निर्णय भइसकेको छैन,’ गुरुङले भने।
पार्टीले जेठ २६ गते एक सूचना जारी गर्दै मधेस अधिवेशनका सम्पूर्ण गतिविधि स्थगित गरेको थियो। पार्टीका दुई पक्षबीचको विवाद बढ्दै गएपछि पार्टी सभापति रवि लामिछानेले असार ३ गते मधेसबाट प्रतिनिधित्व गर्ने सांसद र नेताहरूसँग छलफल गरी विवाद मिलाउने आश्वासन दिएका थिए।
मधेसका आठ जिल्लामध्ये पर्सामा मात्र अधिवेशन सम्पन्न भएको छ। पर्सा–१ बाट निर्वाचित सांसद बुद्धिप्रसाद पन्तको सक्रियतामा त्यहाँ अधिवेशन शान्तिपूर्ण रूपमा सम्पन्न भई नयाँ कार्यसमिति चयन भएको छ। यद्यपि, पर्सामा पनि विवाद र झडपका घटना भएका थिए।
अन्य जिल्लाहरूमा अवस्था जटिल छ। सप्तरी, सिरहा, धनुषा, महोत्तरी, सर्लाही, रौतहट र बारामा वडा तथा पालिका तहदेखि नै विवाद देखिएको छ। धनुषाको गणेशमान चारनाथ नगरपालिकामा एकै पालिकामा दुई पटक अधिवेशन गरी दुई समिति गठन भएको दाबीले विवाद केन्द्रसम्म पुगेको छ। सिरहामा नेतृत्व चयनको विषयलाई लिएर दुई पक्षबीच झडप हुँदा कार्यकर्ता घाइते भएका छन्। धनुषामा जिल्ला सभापतिमाथि कारबाही र प्रतिनिधि व्यवस्थापनको विवादले अधिवेशन प्रभावित भएको छ। महोत्तरीमा विभिन्न स्थानीय तहमा विवाद छ भने सर्लाहीमा मतदाता नामावलीमा प्रश्न उठेपछि अधिवेशन स्थगित भएको छ। रौतहटमा प्रतिनिधि व्यवस्थापन र बारामा जिल्ला नेतृत्व तथा कारबाहीको विषयले तनाव उत्पन्न गरेको छ। सप्तरीमा पनि नेतृत्व र प्रतिनिधि छनोटलाई लिएर विवाद कायमै छ।
केही नेताहरूले मधेसमा अधिवेशन गराउन निकै कठिन रहेको र यसमा संस्थापक नेता तथा संघीय सांसदहरूको ठाडो हस्तक्षेप रहेको आरोप लगाएका छन्। सक्रिय जातीय समूह र नेतृत्वको सङ्कीर्णताका कारण दसैँअघि अधिवेशन हुनेमा उनीहरू शङ्का व्यक्त गर्छन्।
रास्वपाले मधेस बाहेकका ६ वटा प्रदेशमा अधिवेशन सम्पन्न गरिसकेको छ। असार ७ देखि १२ गतेसम्म चितवनमा सम्पन्न भएको पहिलो केन्द्रीय महाधिवेशनले रवि लामिछानेलाई सभापतिमा निर्विरोध चयन गरेको थियो।
स्थानीय तहको निर्वाचनको तयारी अघि बढिरहेका बेला मधेस प्रदेशमा पार्टीको संगठन निर्माण र अधिवेशन प्रक्रिया अनिश्चित हुनुले चुनावी तयारीमा समेत असर पर्ने देखिएको छ। वडा, पालिका र जिल्ला तहकै संरचना विवादित वा अपूर्ण अवस्थामा रहँदा चुनावी तयारी कति प्रभावकारी हुन्छ भन्ने प्रश्न उब्जिएको छ।
