बाराकी तीन वर्षीया बालिका गरिमा चौधरीमाथि भएको जघन्य अपराधले गृहमन्त्री सुदन गुरुङ स्तब्ध भएका छन्। उनले घटनाको निष्पक्ष र प्रभावकारी अनुसन्धान भइरहेको बताउँदै सरकार पहिलो दिनदेखि नै गम्भीर भएको दाबी गरे।
शनिबार सामाजिक सञ्जालमार्फत गुरुङले आरोपितहरू तत्काल पक्राउ भएको र अनुसन्धान जारी रहेको बताए। प्रारम्भिक अनुसन्धानमा प्रहरीबाट लापरबाही भएको प्रश्न उठेपछि सम्बन्धित अधिकारीमाथि छानबिन र कारबाहीको चेतावनी उनले दिए।
‘एउटी सानी छोरीमाथि यस्तो अपराध भएको पीडा कुनै परिवारको मात्र होइन, हाम्रो सम्पूर्ण समाजको पीडा हो। आमाहरू, महिलाहरू र नागरिकहरूमा देखिएको आक्रोशलाई म पूर्ण रूपमा महसुस गर्न सक्छु’, उनले लेखे।
मृत्युदण्डको मागप्रति नागरिकको आक्रोश बुझेको बताउँदै गुरुङले संविधानको धारा १६ को उपधारा २ ले मृत्युदण्ड दिने कानुन बनाउन निषेध गरेको स्मरण गराए। गृह प्रशासनको मुख्य जिम्मेवारी निष्पक्ष अनुसन्धान गरी दोषीलाई उम्कन नदिनु र पीडितलाई न्याय दिलाउनु हो।
‘मृत्युदण्डको मागमा देखिएको आक्रोशलाई पनि म बुझ्छु। तर नेपालको संविधानको धारा १६ को उपधारा २ ले मृत्युदण्ड दिने कानुन बनाउन निषेध गरेको छ। नेपालले मृत्युदण्ड उन्मूलनसम्बन्धी अन्तर्राष्ट्रिय प्रतिबद्धतामा हस्ताक्षर गरेको छ’, उनले लेखे। ‘गृह प्रशासनको मुख्य जिम्मेवारी र सीमा भनेको निष्पक्ष तथा मजबुत अनुसन्धान गर्नु हो। दोषी उम्किन नपाओस् र पीडितले न्याय पाओस्। घटनाको आवेगमा राज्यले तत्काल मृत्युदण्ड दिन सक्ने कानुनी अवस्था छैन।’
महिला तथा बालबालिकाविरुद्ध हुने जघन्य अपराधमा विद्यमान कानुनी बाधा हटाउन कानुन संशोधनको मस्यौदा संसदीय प्रक्रियामा लैजाने तयारी भइरहेको उनले जानकारी दिए।
गरिमाका अभिभावकले जाहेरी दिएपछि अनुसन्धानका लागि थप चारजना पक्राउ भएको गुरुङले बताए। अपुष्ट सूचनाका आधारमा ‘मिडिया ट्रायल’ नगर्न उनले आग्रह गरे। नागरिकको खबरदारी आवश्यक भए पनि अनुसन्धान र न्यायिक प्रक्रियालाई प्रभावित पार्ने काम गर्न नहुने उनको भनाइ छ।
प्रमाण सुरक्षित राख्दै अनुसन्धान निष्पक्ष र वैज्ञानिक बनाउनुपर्ने, दोषी उम्कन नहुने र निर्दोष फस्न नहुनेमा उनले जोड दिए। भविष्यमा यस्ता अपराध रोक्न बलियो कानुनी तथा संस्थागत व्यवस्था निर्माण गर्ने प्रतिबद्धता जनाउँदै उनले भने, ‘आक्रोशलाई न्यायको शक्तिमा बदलौँ। गरिमालाई न्याय दिलाऔँ। हरेक छोरीका लागि सुरक्षित नेपाल बनाऔँ।’
यसैबीच, बाराको जीतपुरसिमरा–१ दशधुरेकी तीन वर्षीया बालिका गरिमा चौधरीको बलात्कारपछि हत्या भएको घटनाको विरोधमा सिरहाको गोलबजारमा युवाहरूले प्रदर्शन गरे। प्रदर्शनकारीले ‘गरिमा बहिनीलाई न्याय दे’, ‘बालेन सरकार न्याय दे’, ‘हत्यारालाई कारबाही गर’, ‘बलात्कारीलाई फाँसी दे’ जस्ता नारा लगाए।
