पृथ्वी राजमार्गको कृष्णभीरमा पहिरोका कारण सडक अवरुद्ध भएपछि काठमाडौं उपत्यकामा खाना पकाउने ग्यास (एलपी ग्यास) आपूर्तिका लागि नेपाल आयल निगमले वैकल्पिक उपाय अपनाएको छ।
आइतबार निगम र नेपाल एलपी ग्यास उद्योग संघबीचको बैठकले काठमाडौं उपत्यका र आसपासका जिल्लामा ग्यास वितरणका लागि नयाँ योजना बनाएको हो।
संघका पूर्व अध्यक्ष एवं एसजी समूहका अध्यक्ष शिवप्रसाद घिमिरेले काठमाडौंमा ग्यासका बुलेट ल्याउन सम्भव नभएकाले वैकल्पिक व्यवस्था गरिएको बताए।
अब चितवन, मकवानपुर, नवलपरासी र पर्सामा रहेका ग्यास उद्योगहरूमा ग्यास रिफिल गरिनेछ। त्यसपछि त्यहाँ रिफिल गरिएका ग्यास काठमाडौं उपत्यका लगायतका क्षेत्रमा वितरण गरिनेछ।
