पर्सा प्रहरीले वीरगञ्जको गण्डकस्थित क्लार्क रिसोर्टमा सञ्चालित गोल्डेन फिगर क्यासिनोमा दोस्रोपटक छापा मारेर जुवा खेलिरहेका चार नेपाली नागरिक र एक कर्मचारीसहित पाँच जनालाई पक्राउ गरेको छ। नेपाली नागरिकलाई क्यासिनोमा जुवा खेल्न निषेध गरिएको भए पनि यसअघि पनि यही क्यासिनोमा नेपाली जुवाडे पक्राउ परेका थिए।
जिल्ला प्रहरी कार्यालय पर्साका अनुसार, पक्राउ पर्नेमा बाराको सिम्रौनगढ नगरपालिका–४ का ५० वर्षीय रामचन्द्र साह, प्रसौनी गाउँपालिका–१ का ४७ वर्षीय सुवास कुमार, प्रसौनी गाउँपालिका–३ का अच्छेलाल प्रसाद र रौतहटको बौधिमाई नगरपालिका–९ का सुमेश्वर जैसवाल छन्। प्रहरीले क्यासिनोमा कार्यरत बाराको परवानीपुर गाउँपालिकाका सुनिल पटेललाई समेत नियन्त्रणमा लिएको छ।
नेपालीलाई क्यासिनोमा जुवा खेल्न निषेध
नेपालमा जुवा खेल्ने वा खेलाउने कार्यलाई मुलुकी अपराध संहिता, २०७४ को दफा १२५ अनुसार अपराध मानिन्छ। क्यासिनो नियमावली–२०८२ ले नेपाली नागरिकलाई क्यासिनोमा जुवा खेल्न पूर्ण रूपमा निषेध गरेको छ। यो कानुन उल्लंघन गर्नेलाई पहिलो पटकमा तीन महिनासम्म कैद वा ३० हजार रुपैयाँसम्म जरिवानाको व्यवस्था छ।
दोस्रो पटकमा एक वर्षसम्म कैद र ५० हजार रुपैयाँसम्म जरिवाना तोकिएको छ। त्यसपछिको कसूरमा पटकैपिच्छे थप तीन महिनासम्म कैद र १० हजार रुपैयाँसम्म जरिवाना हुने व्यवस्था छ। जुवा खेल्न प्रयोग भएको साधन र जुवा खालमा प्राप्त सम्पूर्ण चलअचल सम्पत्ति जफत हुने कानुनी व्यवस्था पनि छ।
छापा र बरामद सामग्री
प्रहरीले क्यासिनोमा नेपाली नागरिकले जुवा खेलिरहेको सूचनाका आधारमा छापा मारेर उनीहरूलाई नियन्त्रणमा लिएको हो। छापामारीका क्रममा पक्राउ पर्नेहरूबाट नगद, क्यासिनोमा प्रयोग हुने क्वाइन र मोबाइल फोन लगायतका सामग्री समेत बरामद गरिएको जिल्ला प्रहरी कार्यालय पर्साले जनाएको छ।
जिल्ला प्रहरी कार्यालय पर्साका निमित्त सूचना अधिकारी प्रहरी निरीक्षक विकास राईले घटनाबारे थप अनुसन्धान भइरहेको बताएका छन्।
यसअघि: वीरगञ्ज क्यासिनोमा नेपालीलाई जुवा खेलाएको आरोपमा पाँच जना पक्राउ, कानुन उल्लंघनको गम्भीर प्रश्न
