नेपाल प्रिमियर लिग (एनपीएल) २०२६ अन्तर्गत कीर्तिपुरस्थित टीयू अन्तर्राष्ट्रिय क्रिकेट मैदानमा भएको खेलमा काठमाडौं गुर्खाजले लुम्बिनी लायन्सलाई ३६ रनले पराजित गरेको छ। काठमाडौं गुर्खाजले दिएको १६१ रनको लक्ष्य पछ्याएको लुम्बिनी लायन्स १९.३ ओभरमा १२४ रनमै समेटिन पुग्यो।
काठमाडौं गुर्खाजका ओपनर डेभिड वार्नरले ६६ रन बनाए भने जहान्दाद खानले ४ विकेट लिएर गुर्खाजको जितमा निर्णायक भूमिका खेले। वार्नरले ५० बलमा ९ चौका र १ छक्कासहित ६६ रनको योगदान दिएका थिए।
जहान्दादको घातक स्पेलले लुम्बिनीको ब्याटिङ ध्वस्त
१६१ रनको लक्ष्य पछ्याएको लुम्बिनी लायन्सको सुरुवात निकै खराब रह्यो। टोलीले पावरप्ले (पहिलो ६ ओभर) भित्रै ३४ रन जोड्दा महत्वपूर्ण ६ विकेट गुमाइसकेको थियो। जहान्दाद खानले दोस्रो ओभरमा २ र चौथो ओभरमा २ विकेट लिएर लुम्बिनीको ब्याटिङ लाइनअप ध्वस्त पारे। उनले कुल ४ ओभरमा २३ रन खर्चेर ४ विकेट लिए।
लुम्बिनीका लागि सुदीप जोराले सर्वाधिक ४४ रन बनाए पनि अन्य ब्याट्सम्यानले राम्रो प्रदर्शन गर्न सकेनन्। अभिषेक गौतमले १६ र निरोशन डिकवेलाले १४ रन जोड्नुबाहेक अन्य खेलाडीले दोहोरो अंकमा रन जोड्न सकेनन्। काठमाडौं गुर्खाजका करण केसीले पनि २ विकेट हात पारे।
काठमाडौं गुर्खाजको इनिङ्स: वार्नर र पटेलको शतकीय साझेदारी
टस जितेर पहिले फिल्डिङ रोजेको लुम्बिनी लायन्सविरुद्ध ब्याटिङ गरेको काठमाडौं गुर्खाजले निर्धारित २० ओभरमा ८ विकेट गुमाएर १६० रन बनाएको थियो। डेभिड वार्नर र सहिल पटेलले १०४ रनको शतकीय साझेदारी गर्दै टोलीलाई बलियो योगफलतर्फ डोर्याए।
सहिल पटेलले ३६ बलमा २ चौका र २ छक्कासहित ३८ रन बनाए भने सहान अरचिगेले १५ बलमा ३ चौका र १ छक्कासहित ३४ रनमा अविजित रहे। लुम्बिनी लायन्सका अभिषेक गौतम र शेर मल्लले समान २–२ विकेट लिएका थिए।
अंक तालिकामा काठमाडौं गुर्खाज दोस्रो स्थानमा
यो जितसँगै काठमाडौं गुर्खाज नेपाल प्रिमियर लिगको अंक तालिकामा दोस्रो स्थानमा उक्लिएको छ। चार खेल खेलेको गुर्खाजको ६ अंक भएको छ। पाँच खेलबाट ७ अंक जोडेको लुम्बिनी लायन्स भने अझै शीर्ष स्थानमा कायमै छ।
