अमेरिकाको भर्जिनिया राज्यमा नेपाली मूलका नरेश भट्ट पत्नी ममता काफ्ले भट्टको प्रथम श्रेणीको हत्यामा दोषी ठहर भएका छन्।
प्रिन्स विलियम काउन्टी अदालतको जुरीले मंगलबार साँझ करिब पाँच घण्टाको छलफलपछि भट्टलाई दोषी ठहर गरेको हो। जुरीले भट्टको आत्महत्याको दाबी अस्वीकार गर्दै उनलाई प्रथम श्रेणीको हत्या, शव लुकाएको र शवको अपमान गरेको तीनवटै अभियोगमा दोषी ठहर गरेको छ।
पृष्ठभूमि
- ममता काफ्ले भट्ट सन् २०२४ जुलाई २७ मा अन्तिमपटक कार्यस्थलमा देखिएकी थिइन्।
- जुलाई २९, २०२४ को रातमा ममताको हत्या भएको डीएनए परीक्षणबाट पुष्टि भएको थियो।
- नरेश भट्टले ममता बेपत्ता भएको रिपोर्ट अगस्ट ५, २०२४ मा दर्ता गराएका थिए।
- प्रहरीले सन् २०२४ अगस्ट २२ मा नरेश भट्टलाई पक्राउ गरेको थियो।
भट्टले अदालतमा ममताको शव टुक्राटुक्रा पारेको स्वीकार गरेका थिए तर मृत्यु आत्महत्याका कारण भएको दाबी गरेका थिए। अभियोजन पक्षले भट्टले नै योजनाबद्ध रूपमा ममताको हत्या गरी उत्तर भर्जिनियाका विभिन्न स्थानहरूमा फोहोरका झोलाहरूमा लासका टुक्राहरू लुकाएको प्रमाणित गरेको थियो।
फैसला सुनाइएपछि ममताका साथीहरूले अदालतबाहिर न्याय प्रणालीमा विश्वास व्यक्त गर्दै खुशी जनाएका छन्। ममताकी निकट साथी तथा सहकर्मी सुनिता बस्नेत थापाले सन् २०२३ को डिसेम्बरमा ममताको अनुहारमा चोट देखेको र त्यो पति भट्टको कुटपिटबाट भएको हुनसक्ने दाबी गरेकी थिइन्।
प्रथम श्रेणीको हत्यामा दोषी ठहर भएका नरेश भट्टलाई कम्तीमा २० वर्षदेखि आजीवन कारावाससम्मको सजाय हुन सक्छ। शव लुकाएको र शवको अपमान गरेको दुई अभियोगमा प्रत्येकमा थप पाँच वर्षसम्म कैद सजाय हुन सक्नेछ।
नरेश भट्टको सजाय निर्धारण आगामी सन् २०२७ मार्च १२ मा हुनेछ। अदालतले उनलाई धरौटीमा रिहा गर्न अस्वीकार गरेकोले उनी सजाय निर्धारण नभएसम्म हिरासतमा नै रहनेछन्। ममता काफ्ले भट्टको शव भने हालसम्म फेला परेको छैन।
यसअघि: ममता काफ्लेको शव टुक्राटुक्रा पारेर फोहोरमा फालेको नरेश भट्टको स्वीकारोक्ति
