भोटेकोशीको बाढीले धादिङको जहरे सबस्टेसनमा करिब १० फिट लेदो जम्दा उपकरणमा क्षति पुगेको थियो। नेपाल विद्युत् प्राधिकरणले १९ दिन लगाएर मर्मत गरी भदौ २८ गते सबस्टेसन पुनः सञ्चालनमा ल्याएको हो।
गत भदौ १० गतेको बाढीले जहरेखेतस्थित सबस्टेसन डुबानमा परेको थियो। प्राधिकरणले जनशक्ति, उपकरण र सामग्री परिचालन गरी मर्मत कार्य तीव्र पारेको थियो।
सबस्टेसन सञ्चालनमा आएसँगै गजुरी बजार, आदमघाट फिडरअन्तर्गतका २२ किलो क्षेत्र तथा पीडा फिडरअन्तर्गत किरान्चोक–मिलनटारलगायतका क्षेत्रमा विद्युत् सेवा पुनःस्थापित भएको छ। प्राधिकरणले प्रभावित क्षेत्रमा विद्युत् आपूर्ति क्रमशः सामान्य बन्दै गएको जनाएको छ।
