भारतबाट दैनिक १६० बुलेट ग्यास आयात गरिने भएको छ। उद्योगमन्त्री दीपक साहले बजारमा ग्यास अभाव अन्त्य गर्न यो निर्णय भएको बताए। भारतले समेत उक्त परिमाणमा ग्यास आपूर्ति गर्न सहमति जनाएको छ।
मन्त्री साहका अनुसार, यो आयातले एक साताभित्र ग्यासको समस्या समाधान गर्नेछ। यसअघि दैनिक करिब १०० बुलेट ग्यास आयात हुन्थ्यो।
गत असोज १० र १४ गते त्रिशुलीमा आएको बाढीले कृष्णभीरमा सडक कटान गरेपछि ग्यास आपूर्ति प्रभावित भएको थियो। हाल मकवानपुर, चितवन, नवलपरासी, बारा र पर्सामा बुलेटबाट ग्यास रिफिल गरी वैकल्पिक मार्गबाट ट्रक मार्फत आयात भइरहेको छ।
मन्त्री साहले आयल निगमको स्थलगत निरीक्षण गरी ग्यासको माग र आपूर्तिको अवस्था बुझेका थिए। उनले ग्यास अभाव समाधान गर्न आयात परिमाण बढाउन निगमलाई निर्देशन दिए। सोही निर्देशनअनुसार निगमले इन्डियन आयल कर्पोरेसनलाई पत्राचार गरेको हो।
