राजविराजस्थित गजेन्द्रनारायण सिंह अस्पतालमा सघन उपचार कक्ष (आइसियु) र भेन्टिलेटर जडानका लागि ठाउँ अभाव छ। स्वास्थ्य तथा खाद्य स्वच्छतामन्त्री निशा मेहताले आइतबार अस्पतालको स्थलगत निरीक्षण गरी भदौभित्र नयाँ भवन निर्माण गरी हस्तान्तरण गर्न निर्देशन दिइन्। करिब ३१ करोडको लगानीमा निर्माणाधीन भवनबाट सेवा सञ्चालन भएपछि अधिकांश समस्या समाधान हुने विश्वास उनले व्यक्त गरिन्।
सप्तरीको गजेन्द्रनारायण सिंह अस्पताल र प्रस्तावित रामराजाप्रसाद सिंह स्वास्थ्य विज्ञान प्रतिष्ठानको अवस्थाबारे जानकारी लिन राजविराज पुगेकी मन्त्री मेहताले भवन अभावले सेवा प्रवाहमा बाधा पुगेको स्वीकार गरिन्। उनले निर्माण कम्पनीलाई भदौभित्र भवन हस्तान्तरण गरी सेवा व्यवस्थित बनाउन सहकार्य र समन्वय गर्न आग्रह गरिन्।
अस्पतालको सभाकक्षमा सरोकार भएका निकायका प्रतिनिधिसँगको छलफलमा मन्त्री मेहताले स्वास्थ्य क्षेत्रको समस्या बुझ्न स्थलगत अवलोकन गरिएको बताइन्। टोलीले भारदह अस्पताल र प्रस्तावित रामराजाप्रसाद सिंह स्वास्थ्य विज्ञान प्रतिष्ठान निर्माणस्थलको पनि निरीक्षण गरेको छ।
हाल ५० शय्यामा सञ्चालित अस्पताललाई एक सय शय्यामा विस्तार गर्ने तयारी भइरहेको छ। रामराजा स्वास्थ्य विज्ञान प्रतिष्ठान सञ्चालनमा आएपछि स्थानीयलाई उपचारमा सहजता आउने विश्वास मन्त्री मेहताले व्यक्त गरिन्। प्रतिष्ठानका लागि चालु आवमा ५० करोड बजेट विनियोजन गरिएको छ। ऐन पारित गरी प्रतिष्ठानको निर्माण प्रक्रिया अघि बढाइनेछ।
प्रतिनिधिसभा सदस्यद्वय डा अङ्किता ठाकुर र पुष्पा चौधरी सहभागी रहेको टोलीमा अस्पतालका अधिकृत सूर्यकान्त झाले ५० शय्याको स्वीकृतिमा ठूलो सङ्ख्यामा बिरामीलाई सेवा दिनुपरेको बताए। नर्सिङ कलेजका लागि नयाँ भवन तयार भए पनि जनशक्ति र बजेट अभावले सञ्चालनमा आउन नसकेको भन्दै उनले आवश्यक व्यवस्था गर्न मन्त्री मेहतासँग आग्रह गरे।
