हेटौँडाको सेल्फी रोडस्थित सामुदायिक वनमा बोराभित्र खाल्डो खनी फालिएको अवस्थामा एक महिलाको शव भेटिएको छ। स्थानीयवासी च्याउ टिप्न जंगल पुगेका बेला शव देखेपछि प्रहरीलाई खबर गरेका थिए।
जिल्ला प्रहरी कार्यालय मकवानपुरका प्रवक्ता डीएसपी माधवप्रसाद काफ्लेका अनुसार सूचना पाएलगत्तै प्रहरी टोली घटनास्थल पुगेको थियो। प्रहरी उपरीक्षक श्यामबहादुर खत्रीको नेतृत्वमा तालिमप्राप्त कुकुरसहितको टोली परिचालन गरिएको छ।
प्रहरीका अनुसार बोराभित्र अन्दाजी ३० देखि ३२ वर्ष उमेरकी जस्तो देखिने महिलाको शव फेला परेको हो। मृतकको नाम, थर र ठेगाना भने अहिलेसम्म खुल्न सकेको छैन।
विज्ञापन
कानुनी प्रक्रिया पूरा गरी शव हेटौँडा अस्पतालमा ल्याइएको छ। घटनाको प्रकृति र मृतकको पहिचान खुलाउने विषयमा थप अनुसन्धान भइरहेको प्रहरीले जनाएको छ।
