गृह मन्त्रालयले हुम्ला र बाजुराको सीमा क्षेत्रमा उत्पन्न घटनाको सत्यतथ्य छानबिन गर्न प्रहरी वरिष्ठ उपरीक्षक (एसएसपी) को संयोजकत्वमा टोली गठन गरेको छ। मन्त्रालयले आज जारी विज्ञप्तिमा दुवै जिल्लाका नागरिकलाई संयमता अपनाउन अनुरोध गरेको छ।
विज्ञप्ति अनुसार, सीमा क्षेत्रमा नागरिकको जीउधनको सुरक्षा र शान्ति कायम राख्न सरकार प्रतिबद्ध छ। गृह सचिवको संयोजकत्वमा बसेको आकस्मिक बैठकले उक्त छानबिन टोली गठन गरेको हो। रक्षा सचिवसहित सुरक्षा निकायका प्रमुखहरूको उपस्थितिमा बसेको बैठकले टोलीलाई तत्काल घटनास्थलमा खटिएर प्रतिवेदन बुझाउन निर्देशन दिएको छ।
घटनाको जानकारी प्राप्त हुनासाथ गृह मन्त्रालयले नेपाल प्रहरी र सशस्त्र प्रहरी बलको विशेष टोलीलाई घटनास्थलमा परिचालन गरिसकेको जनाएको छ। सीमा क्षेत्रमा नागरिक सुरक्षा र सुव्यवस्था मजबुत बनाउन जिल्ला सुरक्षा समितिलाई उच्च सतर्कता अपनाउन र भविष्यमा यस्ता घटना दोहोरिन नदिन सुरक्षा रणनीति तय गर्न निर्देशन दिइएको छ।
स्थिति नियन्त्रण र दीर्घकालीन शान्तिका लागि दुवै सुरक्षा निकायलाई थप सुरक्षाकर्मी परिचालन गर्न भनिएको छ। मन्त्रालयले विवादको स्थायी समाधान र समन्वयका लागि जनप्रतिनिधि तथा सरोकारवाला निकायहरूसँग समन्वय बैठक आयोजना गरी पहलकदमी अघि बढाएको विज्ञप्तिमा उल्लेख छ।
