नेपाल कम्युनिष्ट पार्टी (एमाले) का महासचिव शंकर पोखरेलले जनमत वामपन्थी शक्तिबाट टाढिनुको कारणबारे गम्भीर समीक्षा गर्नुपर्ने समय आएको बताएका छन्। उनले आफ्नै नेतृत्वको सरकारबाट अपदस्थ हुनुपरेको यथार्थबारे पनि निर्मम समीक्षा जरुरी रहेको औंल्याएका हुन्।
समाजवाद अध्ययन केन्द्र नेपालले काठमाडौंमा आयोजना गरेको ‘वामपन्थी आन्दोलन अब के गर्ने ? राष्ट्रिय बहस !’ कार्यक्रममा बोल्दै महासचिव पोखरेलले विगतका कमजोरीहरूको गम्भीर समीक्षा नगरी वामपन्थी आन्दोलनको पुनर्गठन सम्भव नहुने बताए।
उनले जनमत आफूहरूबाट विमुख हुनुको मुख्य कारण पहिचान गर्नुपर्नेमा जोड दिए। ‘कम्युनिस्ट पार्टीकै नेतृत्व रहेको बेला सरकारबाट अपदस्थ हुनुपरेको छ,’ पोखरेलले भने, ‘यो यथार्थलाई गम्भीर समीक्षा नगरी वामपन्थी आन्दोलनलाई पुनर्गठन गर्न सम्भव छैन।’
नेपालको वामपन्थी आन्दोलनले हालसम्म ६ जना प्रधानमन्त्री र २१ जना मुख्यमन्त्री जन्माइसकेको ऐतिहासिक पृष्ठभूमि स्मरण गराउँदै उनले यति ठूलो जनआधार र राजनीतिक प्रभाव भएको शक्ति कमजोर हुनुको गम्भीर कारण खोज्नुपर्ने बताए।
‘नेपालको कम्युनिस्ट आन्दोलन सामान्य थिएन,’ पोखरेलले थपे, “विगतका राजनीतिक अभ्यास, जनतासँगको सम्बन्ध तथा जनमतमा आएको परिवर्तनको वस्तुनिष्ठ समीक्षा गरेर मात्रै वामपन्थी आन्दोलनलाई नयाँ आधारमा पुनर्गठन गर्न सकिन्छ।’
कार्यक्रममा नेकपा संयुक्तका कार्यवाहक अध्यक्ष घनश्याम भुसाल, नेकपाका नेता शक्तिबहादुर बस्नेत, एमाले नेता कर्ण थापा तथा राष्ट्रियसभा सदस्य गणेश विकलगायत शीर्ष नेताहरूको उपस्थिति रहेको थियो।
यसैबीच, एमाले अध्यक्ष तथा पूर्वप्रधानमन्त्री केपी शर्मा ओलीले नेपाली जनताको बुद्धिमा ग्रहण लागेका कारण बालेन शाह प्रधानमन्त्री बनेको टिप्पणी गरेका छन्। उनले वर्तमान सरकारबाट देश चल्न नसक्ने दाबी गर्दै देश र जनताको बुद्धिमा नै ग्रहण लागेको जस्तो अवस्था आएको बताए।
अर्को प्रसंगमा, नेपाली कांग्रेसका सभापति गगन थापाले नेपालका राजनीतिक दलहरू निराशाको कारखानामात्र बनेको आरोप लगाएका छन्। उनले संस्थापन इतर समूहको भेलातर्फ इङ्गित गर्दै विगत तीन दिनमा आफ्नो जीवनभर नभएको निन्दा खेप्नुपरेको बताए।
