राष्ट्रिय स्वतन्त्र पार्टीका सांसद सुशील खड्काले फोहोरमैला व्यवस्थापन र रिसाइक्लिङ क्षेत्रलाई धरासायी हुनबाट जोगाउन कवाडी कर खारेज गर्न सरकारको ध्यानाकर्षण गराएका छन्। प्रतिनिधि सभाको बिहीबारको बैठकमा बोल्दै खड्काले रिसाइक्लिङ सामग्रीमा लगाइँदै आएको कवाडी कर पूर्णरूपमा खारेज गरिनुपर्ने माग गरे।
उनले कुहिने फोहोरबाट कम्पोस्ट मल बनाउन र खुला रूपमा जलाइने तथा रिसाइकल नहुने प्लास्टिकलाई सिमेन्ट उद्योगमा प्रयोग गर्न प्रोत्साहन गरिनुपर्ने बताए। सांसद खड्काले कवाडी कर खारेज गरी यस क्षेत्रलाई विशेष उद्योगको दर्जा दिनुपर्ने धारणा राखे।
सांसद खड्काले यस कदमले रिसाइक्लिङ उद्योगमा संलग्न हजारौं व्यक्तिहरूको रोजगारी सुरक्षा हुने र वातावरणीय प्रदूषण न्यूनीकरणमा टेवा पुग्ने बताए। उनले यस विषयमा थप छलफलका लागि संसदमा आगामी बिहीबारको बैठकमा पुनः प्रस्ताव पेश गर्ने जानकारी दिए।
