विराटनगर । कोशी प्रदेश सरकारबाट कांग्रेसका मन्त्रीहरूलाई फिर्ता बोलाउने वा नबोलाउने भन्ने विषयमा प्रदेश संयन्त्रको बैठक निष्कर्षविहीन भएको छ। बिहीबार बसेको बैठकले तत्काल सरकारबाट मन्त्रीहरू फिर्ता बोलाउने निर्णय गर्न सकेन।
कांग्रेस कोशी प्रदेशका सभापति तथा दलका नेता उद्धव थापाको अध्यक्षतामा बसेको बैठकमा उपनेता हिमाल कार्की, प्रमुख सचेतक गोपाल तामाङ, सहमहामन्त्री उमेश थापा, नेता तथा सांसद अमृत अर्याल, गयानन्द मण्डल, मैयाँ श्रेष्ठलगायत सहभागी थिए। तर, सरकारमा सहभागी भौतिक पूर्वाधार विकास मन्त्री प्रदीपकुमार सुनुवार बैठकमा अनुपस्थित रहे।
मन्त्री सुनुवारले आफू संयन्त्रको बैठकमा सहभागी नहुने बताए। केही मन्त्रीहरू पार्टी सभापति गगन थापाले दिएको निर्देशन नमान्ने अडानमा रहेको दाबी गरिएको छ।
वर्तमान सरकारमा कांग्रेसका तर्फबाट भौतिक पूर्वाधार विकास मन्त्री सुनुवारसहित स्वास्थ्यमन्त्री मानबहादुर लिम्बू, पर्यटन, वन तथा वातावरण मन्त्री भीम पराजुली, उद्योग, कृषि तथा सहकारी मन्त्री इस्राइल मन्सुरी र भौतिक पूर्वाधार राज्यमन्त्री शोभा चेम्जोङ सहभागी छन्।
कांग्रेस कोशी प्रदेशका संसदीय दलका नेता उद्धव थापाले पत्रकारहरूसँग कुरा गर्दै आजै प्रदेश सरकारबाट मन्त्रीहरू फिर्ता नहुने जानकारी दिए। उनले प्रदेश सरकारबाट मन्त्रीहरू फिर्ता हुने विषय केन्द्रको निर्णय र निर्देशनमा निर्भर रहेको स्पष्ट पारे।
थापाका अनुसार कांग्रेसले एमालेसँगै नयाँ सहमति गरेर सातै प्रदेशमा सरकार बनाउने, एमालेसँगको प्रयास सफल नभए नेकपासँग मिलेर सबै प्रदेशमा सरकार बनाउने र त्यसो पनि हुन नसकेको अवस्थामा सबै प्रदेशमा प्रतिपक्षमा बस्ने रणनीति बनाएको छ। सोही रणनीति अनुसार केन्द्रले एमाले, नेकपा र अन्य साना दलहरूसँग छलफल अघि बढाएको छ।
एमालेसँगको पुरानो सहमति समाप्त भइसकेका कारण नयाँ सिराबाट सबै विकल्पहरूमा दलहरूसँग छलफल सुरू भएको थापाले बताए।
