मधेस प्रदेशमा चालु आर्थिक वर्ष २०८३/८४ को पहिलो दुई महिनामा विद्युत् चुहावट १.६१ प्रतिशतले घटेर २०.९५ प्रतिशतमा झरेको छ। यस अवधिमा विद्युत् महसुल नतिर्ने ग्राहकबाट २० करोड नौ लाख ७७ हजार रुपैयाँ बक्यौता असुल भएको छ।
नेपाल विद्युत् प्राधिकरण मधेस प्रदेश प्रादेशिक कार्यालय जनकपुरधामका प्रमुख इन्जिनियर शम्भु कुसियैतका अनुसार, विद्युत् चुहावट नियन्त्रण अभियान, हुकिङ नियन्त्रण, ग्राहकको बिलिङमा सुधार र मिटर परिवर्तनजस्ता कारणले चुहावटमा कमी आएको हो। गत आर्थिक वर्ष २०८२/८३ को साउन र भदौमा २२.५६ प्रतिशत चुहावट भएकोमा यस वर्षको सोही अवधिमा २०.९५ प्रतिशतमा झरेको प्राधिकरणले जनाएको छ। प्राधिकरणका अनुसार, चालु आर्थिक वर्षको साउनमा २०.०९ प्रतिशत र भदौमा २१.७६ प्रतिशत विद्युत् चुहावट भएको थियो। गत आर्थिक वर्षको साउनमा २५.६७ प्रतिशत र भदौमा २३.५२ प्रतिशत चुहावट भएको थियो।
रौतहटमा उच्च, बारामा न्यून चुहावट
विद्युत् चुहावटको अवस्था जिल्ला अनुसार फरक देखिएको छ। बाराको सिमरा वितरण केन्द्रमा सबैभन्दा कम २.९४ प्रतिशत चुहावट भएको छ, जुन औद्योगिक ग्राहकको संख्या धेरै भएकाले तुलनात्मक रूपमा कम रहेको प्रमुख कुसियैतले बताए।
यसको विपरीत, रौतहटको मौलापुर वितरण केन्द्रमा सबैभन्दा बढी ४७.७७ प्रतिशत विद्युत् चुहावट भएको छ। रौतहटको मौलापुर र गौर क्षेत्र तथा सर्लाहीको मलङ्गवालगायतका क्षेत्रमा विद्युत् चुहावटको समस्या अझै बढी देखिएको प्राधिकरणको भनाइ छ।
बक्यौता असुली र लाइन काट्ने अभियान
चालु आर्थिक वर्षको पहिलो दुई महिनामा विद्युत् महसुल नतिर्ने आठ हजार ७८२ ग्राहकको लाइन काटिएको थियो। तीमध्ये आठ हजार २३४ ग्राहकले पुनः विद्युत् जडान गराएका छन्। उनीहरूबाट २० करोड नौ लाख ७७ हजार रुपैयाँ बक्यौता असुल भएको प्राधिकरणले जनाएको छ।
मिटर लिएर विद्युत् उपभोग गर्ने तर लामो समयसम्म महसुल नतिर्ने प्रवृत्ति बढेकाले लाइन काट्ने अभियान सञ्चालन गरिएको प्रमुख कुसियैतले जानकारी दिए। गत आर्थिक वर्षमा ४२ हजार ६६४ ग्राहकको लाइन काट्दा एक अर्ब चार करोड सात लाख रुपैयाँ बक्यौता असुल भएको थियो।
मधेस प्रदेशमा विद्युत् पहुँच
मधेस प्रदेशका ९९.९९ प्रतिशत घरधुरीमा विद्युत् सेवा पुगेको छ। बाँकी क्षेत्रमा पनि निरन्तर विद्युत् जडानको काम भइरहेको छ। मधेस प्रदेशमा ५९ प्रतिशत औद्योगिक र ३१ प्रतिशत घरेलु ग्राहक रहेका छन्। कृषि सिँचाइका लागि करिब १० प्रतिशत मात्रै विद्युतीकरण भएको प्राधिकरणले जनाएको छ।
