महोत्तरी जिल्ला प्रशासन कार्यालयबाट चार महिनाको अवधिमा २०९ जनाले आमाको नामबाट वंशज नागरिकता प्राप्त गरेका छन्। यो व्यवस्थाले बाबुको पहिचान नभएका सन्तानलाई नागरिकता प्रदान गर्ने प्रक्रियालाई सहज बनाएको छ।
सरकारले २०८२ पुस ११ को मन्त्रिपरिषद् निर्णयअनुसार पुस २१ गते राजपत्रमा सूचना प्रकाशित गरी यो व्यवस्था कार्यान्वयनमा ल्याएको थियो। आवश्यक कागजी प्रक्रिया पूरा गरेर २०८२ माघ ६ गतेदेखि जिल्ला प्रशासन कार्यालयबाट आमाको नामबाट नागरिकता वितरण सुरु गरिएको थियो।
प्रमुख जिल्ला अधिकारी इन्द्रदेव यादवका अनुसार, नेपाली आमाबाट नेपालमै जन्मेका र बाबुको पहिचान हुन नसकेका व्यक्तिहरूले स्वघोषणा र प्रक्रिया पूरा गरेर वंशज नागरिकता पाएका हुन्। २०८२ माघ ६ देखि २०८३ जेठ ९ गतेसम्म जम्मा २०९ जनाले यसरी नागरिकता लिएका छन्।
