मकवानपुर दुर्घटना: १३ शव बुझ्न परिवारको अस्वीकार, क्षतिपूर्ति र रोजगारीको माग

मकवानपुरको भीमफेदी गाउँपालिका–६ चिसापानीगढीमा बिहीबार भएको ईभी हाइस दुर्घटनामा ज्यान गुमाएका १४ मध्ये १३ जनाको शव आफन्तले बुझ्न अस्वीकार गरेका छन्। सर्लाहीको चक्रघट्टा गाउँपालिका–४ सुन्दरपुरका बासिन्दा रहेका मृतकका परिवारले उचित क्षतिपूर्ति र परिवारका एक सदस्यलाई रोजगारीको माग राखेका हुन्।

पीडित परिवारले मृतकका प्रत्येक परिवारलाई १० लाख रुपैयाँ क्षतिपूर्ति, परिवारका एक सदस्यलाई रोजगारीको व्यवस्था र घाइतेहरूको सम्पूर्ण उपचार खर्च सरकारले व्यहोर्नुपर्ने माग राखेका छन्। संघीय सरकारबाट ठोस निर्णय र स्पष्ट सम्बोधन नभएसम्म शव नबुझ्ने उनीहरूको अडान छ।

यस विषयमा पीडित परिवार, मकवानपुरका प्रमुख जिल्ला अधिकारी वसन्त अधिकारी र जिल्ला प्रहरी कार्यालय मकवानपुरका प्रमुख प्रहरी उपरीक्षक श्यामबहादुर खत्रीबीच भएको छलफल निष्कर्षविहीन बनेको थियो। प्रहरीका अनुसार क्षतिपूर्ति र पीडित परिवारका अन्य मागबारे आज (शुक्रबार) पनि छलफल जारी रहनेछ।

छठ पर्व मनाएर काठमाडौँबाट सर्लाहीतर्फ घर फर्किने क्रममा बिहीबार बिहान करिब ६ः१० बजे दुर्घटनामा परेका सुन्दरपुरका १३ जनाको मृत्यु भएपछि पूरै गाउँ शोकमा डुबेको छ। दुर्घटनामा परेर सर्लाहीको चक्रघट्टा गाउँपालिका–४ सुन्दरपुरटोलका अवधेश यादवकी श्रीमती पुनमदेवी यादव, छोरी अनुकुमारी, दीक्षा, दीपिका तथा दुई भाइ विकेश र सुवोध यादवको मृत्यु भएको छ। अवधेश यादव गाडीमा ठाउँ नपुगेपछि परिवारका सदस्यलाई पठाएर आफू पछि आउने निर्णय गरेकाले जोगिएका थिए।

क्षतिपूर्तिमा कानुनी प्रावधान र परिवारको माग

पीडित परिवारले राखेका माग र कानुनी प्रावधानबीचको अन्तरले समस्या समाधानमा जटिलता ल्याएको छ। मकवानपुरका प्रमुख जिल्ला अधिकारी वसन्त अधिकारीले पीडित परिवारलाई कानुनले तोके बमोजिमको मात्रै क्षतिपूर्ति दिन सकिने बताएका छन्। उनले कानुन बमोजिम पाउनुपर्ने क्षतिपूर्ति नलिए शव पोस्टमार्टम गर्ने र कानुनअनुसार शव व्यवस्थापन गर्ने चेतावनीसमेत दिएका छन्।

हाल सवारी दुर्घटनामा मृत्यु भएमा बीमा कम्पनीले मृतकका परिवारलाई ५ लाख रुपैयाँ क्षतिपूर्ति दिने गरेको छ। यातायात व्यवस्था विभागले तेस्रो पक्ष बीमा शतप्रतिशत बढाएर १० लाख रुपैयाँ पुर्‍याउने योजना अघि सारेको छ। यस्तै, घाइतेको उपचारका लागि बीमा कम्पनीबाट हाल ३ लाख रुपैयाँसम्म व्यहोर्ने गरिएको छ। मकवानपुर प्रशासनले चालकको लापरबाहीले भएको दुर्घटनामा राजनीतिक स्वार्थले मृतक परिवारलाई भड्काउने कार्य भइरहेको आशंका गरेको छ।

दुर्घटनामा १४ जनाको मृत्यु भएको थियो भने ६ जना घाइते भएका थिए। घाइतेमध्ये तीन जना उपचारपछि हेटौँडा अस्पतालबाट डिस्चार्ज भएका छन् भने तीन जनालाई थप उपचारका लागि चितवन रिफर गरिएको छ। दुर्घटनाको छानबिन गर्न जिल्ला प्रशासन कार्यालय मकवानपुरले सहायक प्रमुख जिल्ला अधिकारीको संयोजकत्वमा पाँच सदस्यीय समिति गठन गरेको छ, जसलाई एक साताभित्र प्रतिवेदन बुझाउन कार्यादेश दिइएको छ।

सरकारले भीमफेदी दुर्घटनाका पीडित परिवारलाई आवश्यक सहयोग, राहत तथा क्षतिपूर्ति उपलब्ध गराउने प्रतिबद्धता जनाएको छ। प्रधानमन्त्री तथा मन्त्रिपरिषद् कार्यालयका अनुसार घाइतेको उपचार खर्च र मृतकका परिवारले पाउने रकम उपलब्ध गराउन सम्बन्धित सवारीधनी, यातायात व्यवसायी र बिमा कम्पनीसँग समन्वय भइरहेको छ। तर, पीडित परिवारले भने ठोस निर्णय नआएसम्म शव नबुझ्ने अडान कायमै राखेका छन्।

यसअघि: मकवानपुर दुर्घटना: सर्लाहीको सुन्दरपुर गाउँ शोकमा, छानबिन समितिले प्रतिवेदन बुझाउने