नेपालमै पहिलो पटक मुटु प्रत्यारोपण सेवा सुरु गर्न आवश्यक तयारी भइरहेको छ।
दक्ष चिकित्सकहरू तयार भए पनि अस्पताललाई संस्थागत लाइसेन्स नहुँदा यो सेवा सञ्चालन हुन सकेको छैन। त्रिवि मनमोहन कार्डियोथोरासिक भास्कुलर एन्ड ट्रान्सप्लान्ट सेन्टरका चिकित्सकहरूले मुटु तथा फोक्सो प्रत्यारोपणसम्बन्धी व्यक्तिगत लाइसेन्स प्राप्त गरिसकेका छन्।
सेन्टरका कार्यकारी निर्देशक प्राडा रत्नमणि गजुरेलले मुटु प्रत्यारोपणका लागि आवश्यक जनशक्ति तयार भइसकेको पुष्टि गरे। उनले इटाली र सिङ्गापुरमा प्रत्यारोपणसम्बन्धी फेलोसिप गरेका छन्।
स्वास्थ्य तथा खाद्य स्वच्छता मन्त्रालयका सचिव डा. विकास देवकोटाले नेपालमै मुटु र फोक्सो प्रत्यारोपणको जनशक्ति तयार हुनु गौरवको विषय भएको बताए। नेपालमा मुटु प्रत्यारोपणका लागि ट्रान्सप्लान्ट कार्डियोलोजी र ट्रान्सप्लान्ट सर्जनतर्फ गरी आठ जना चिकित्सकले लाइसेन्स लिएका छन्। फोक्सो प्रत्यारोपणका लागि दुई जना र ट्रान्सप्लान्ट एनेस्थेसियोलोजीका लागि दुई जनाले पनि लाइसेन्स प्राप्त गरेका छन्।
मनमोहन सेन्टरका कार्डियोथोरासिक भास्कुलर सर्जरी विभागीय प्रमुख डा. अनिल भट्टराईले चिकित्सकको लाइसेन्स प्राप्त भए पनि अस्पताललाई संस्थागत लाइसेन्स आवश्यक रहेको बताएका छन्। अंग प्रत्यारोपण समन्वय समिति विगत सात महिनादेखि नेतृत्वविहीन रहेकाले अस्पताललाई लाइसेन्स दिने प्रक्रिया रोकिएको छ।
डा. गजुरेलका अनुसार मुटु प्रत्यारोपण मिर्गौला र कलेजो प्रत्यारोपणभन्दा जटिल हुन्छ। जीवित व्यक्तिबाट मुटु दान गर्न नसकिने भएकाले मस्तिष्क मृत्यु भएका व्यक्तिबाट मात्र मुटु तथा फोक्सो प्राप्त गर्नुपर्ने हुन्छ। सरकारले अंग प्रत्यारोपण समन्वय समितिको अध्यक्ष र सदस्यहरू मनोनयन गरेपछि मात्र संस्थागत लाइसेन्स दिने प्रक्रिया अगाडि बढ्नेछ।
