प्युठानको नौबहिनी गाउँपालिका–५ काँटेमा विद्यालयबाट घर फर्कने क्रममा एक्कासि आएको भेलले बगाउँदा दुई दाजुभाइको मृत्यु भएको छ। मंगलबार दिउँसोको यो घटनामा स्थानीय मिलन खत्री र बिमल खत्री बेपत्ता भएका थिए।
जनता प्राथमिक विद्यालय, काँटेमा कक्षा १ मा अध्ययनरत बिमल खत्रीको शव जोगीपँधेरा नजिकै फेला पर्यो। उनका दाइ, कक्षा ३ मा पढ्ने मिलन खत्रीको शव घटनास्थलबाट करिब एक किलोमिटर तल खोलामा भेटिएको स्थानीयले बताए।
भेलले बगाएको सूचना पाउनासाथ स्थानीय बासिन्दा र प्रहरीको टोली तत्कालै खोजी तथा उद्धारमा खटिएको थियो। वर्षापछि आएको बर्खे भेलले विद्यालयबाट घर फर्किरहेका यी दाजुभाइलाई बगाएको थियो।
