ओपेनएआई (OpenAI) का सीईओ साम अल्टम्यानले सामाजिक सञ्जाल X (पहिलेको ट्विटर) मा आफ्नो नाम परिवर्तन गरेर ‘राम अल्टम्यान’ राखेपछि इन्टरनेटमा ठूलो तरंग फैलिएको छ। धेरैले यसलाई धार्मिक आस्थासँग जोडेर हेरे पनि यसको वास्तविकता भने कम्प्युटरको ‘RAM’ (Random Access Memory) सम्बन्धी प्राविधिक बहससँग सम्बन्धित छ।
यो घटना अल्टम्यानको एक विवादास्पद भनाइ र त्यसपछि सुरु भएको ‘मिम वार’ (Meme War) को परिणाम हो।
हालै ‘चिकी पिन्ट’ (Cheeky Pint) नामक पडकास्टमा बोल्दै अल्टम्यानले व्यक्तिगत कम्प्युटरमा धेरै मात्रामा RAM राख्नु विश्वव्यापी स्रोतको बर्बादी भएको बताएका थिए। उनले मानिसहरूले जडान गर्ने ठूलो क्षमताको RAM अधिकांश समय (करिब ९५ प्रतिशत) प्रयोगविहीन रहने तर्क गरेका थिए। यस्तो हार्डवेयरलाई ‘क्लाउड डाटा सेन्टर’ हरूमा प्रयोग गर्दा बढी प्रभावकारी हुने उनको भनाइ थियो।
यस भनाइपछि गेमर, भिडियो सम्पादक र सफ्टवेयर विकासकर्ताहरूले उनको कडा आलोचना सुरु गरे। उनीहरूले दैनिक कार्य र हेभी सफ्टवेयर चलाउन व्यक्तिगत कम्प्युटरमै उच्च क्षमताको RAM आवश्यक पर्ने भन्दै अल्टम्यानको तर्कको खण्डन गरेका थिए।
यो विवादमा टेस्लाका सीईओ एलन मस्कले पनि प्रवेश गर्दै X मा लेखेका थिए, “मानिसहरूले आफ्नो RAM पाउनुपर्छ!” प्रविधि जगत्का हस्तीहरूबीच चलेको यो बहस छिट्टै मिममा परिणत भयो।
यसै क्रममा X का एक प्रयोगकर्ताले अल्टम्यानलाई व्यंग्य गर्दै आफ्नो नाम ‘Ram Altman’ राख्न चुनौती दिएका थिए। आलोचना र व्यंग्यलाई सहज रूपमा लिँदै अल्टम्यानले उक्त चुनौती स्वीकार गरेर आफ्नो डिस्प्ले नाम ‘Ram Altman’ बनाए। नाम परिवर्तनसँगै उनले प्रष्टीकरण पनि दिएका छन्, “‘म चाहन्छु विश्वमा धेरै मेमोरी बनोस् र मानिसहरूले आफ्नो कम्प्युटरमा जति मन लाग्छ त्यति RAM राख्न पाऊन्, तर मेरो भनाइलाई सन्दर्भभन्दा बाहिर लगियो।’”
यसरी एउटा गम्भीर प्राविधिक बहस इन्टरनेटमा ‘साम अल्टम्यान राम’ को भाइरल ट्रेन्ड बनेको छ।
