सिरहामा एसइई परीक्षामा चिटिङ गर्न प्रयोग भएका ४९६ मोबाइल र पाँच स्मार्टवाच नष्ट गरिएका छन्। गत चैतमा सम्पन्न परीक्षाका क्रममा विभिन्न केन्द्रबाट यी उपकरण बरामद भएका थिए।
मधेस प्रदेशकी तत्कालीन शिक्षामन्त्री रानी शर्मा तिवारीले परीक्षामा मोबाइल प्रयोग भए नष्ट गर्ने निर्देशन दिएकी थिइन्। सोही निर्देशनअनुसार जिल्ला परीक्षा समन्वय समिति सिरहाले उपसमिति गठन गरी उपकरण नष्ट गर्ने निर्णय गरेको थियो।
शिक्षा विकास तथा समन्वय इकाइका शाखा अधिकृत राजदेव यादवको नेतृत्वमा पाँच सदस्यीय उपसमिति बनेको थियो। यसमा जिल्ला प्रशासन, प्रहरी, सशस्त्र प्रहरी र राष्ट्रिय अनुसन्धानका प्रतिनिधि थिए।
उपसमिति संयोजक यादवका अनुसार बरामद उपकरण २४ घण्टा पानीमा डुबाएर राखिएको थियो। त्यसपछि प्रयोग गर्न नसक्ने गरी नष्ट गरिएको हो।
बरामद उपकरणको बजार मूल्य करिब एक करोड रुपैयाँभन्दा बढी छ। केही अभिभावकले जरिवाना लिएर मोबाइल फिर्ता मागेका थिए। तर, परीक्षाको मर्यादा कायम राख्न निकायले नष्ट गर्ने निर्णय कार्यान्वयन गर्यो।
मधेस प्रदेशमा एसइई परीक्षामा विद्यार्थीबाट बरामद मोबाइल यसरी ठूलो संख्यामा नष्ट गरिएको यो पहिलो घटना हो।
