सिद्धिचरण राजमार्गको साल्मे खण्डमा पहिरोको उच्च जोखिम बढेपछि रात्रिकालीन सवारी आवागमन बन्द गरिएको छ। जिल्ला प्रशासन कार्यालय सोलुखुम्बुले सोमबार सूचना जारी गरी यो निर्णय गरेको हो।
सोलु दुधकुण्ड नगरपालिका वडा नं. ११ को साल्मे खण्डमा आजैदेखि लागू हुने गरी अर्को सूचना जारी नभएसम्म बेलुकी ६ बजेदेखि बिहान ५ बजेसम्म सडक पूर्ण रूपमा बन्द रहनेछ। उक्त स्थानमा पहिरो खसेर सडक अवरुद्ध भएको थियो। निरन्तर पहिरो झरिरहने खतरा अझै कायमै छ।
हाल उक्त सडक खण्डमा एकतर्फी मात्रै यातायात सञ्चालन भइरहेको छ। रातको समयमा यात्रा गर्दा थप जोखिम हुने भएकाले पैदल यात्री तथा सम्पूर्ण सवारी साधनहरूको आवतजावतमा रोक लगाइएको सहायक प्रमुख जिल्ला अधिकारी देवेन्द्र सुवेदीले जानकारी दिए।
प्रशासनले जोखिमपूर्ण अवस्थालाई मध्यनजर गर्दै सुरक्षित यात्रा गर्न र तोकिएको समय तालिका पूर्ण रूपमा पालना गर्न सबैमा अनुरोध गरेको छ।
