सोलुखुम्बुको सोताङ गाउँपालिकाकी उपाध्यक्ष अन्जु नाछिरिङ राई र छोरा सुनिल नाछिरिङ राईविरुद्ध अख्तियार दुरुपयोग अनुसन्धान आयोगले विशेष अदालत काठमाडौंमा भ्रष्टाचार मुद्दा दायर गरेको छ।
गाउँपालिकामा सञ्चालित ढाका सिलाई बुनाई तालिमको प्रशिक्षकका रूपमा काम दिलाएबापत उपाध्यक्ष राईले ४५ हजार रुपैयाँ घुस मागेको छानबिनबाट पुष्टि भएको अख्तियारले जनाएको छ। उक्त रकम उनले छोरा सुनिलको बैंक खाताको क्युआर कोडमा हाल्न लगाएकी थिइन्।
पदीय जिम्मेवारीको दुरुपयोग गरी उपाध्यक्ष राईले छोरा सुनिलसँग मिलेमतोमा ४५ हजार रुपैयाँ रिसवत लिएको अख्तियारको ठहर छ। यो कार्य भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुर हो।
प्रतिवादी सुनिल नाछिरिङ राईले पनि उपाध्यक्ष राईसँग मिलेमतो गरी सेवाग्राहीबाट ४५ हजार रुपैयाँ घुस रकम लिएर प्रयोगमा ल्याएको पाइएको छ। यो कार्य भ्रष्टाचार निवारण ऐन, २०५९ को दफा ३ को उपदफा (२) बमोजिमको कसुर हो।
अख्तियारका प्रवक्ता सुरेश न्यौपानेका अनुसार दुवै प्रतिवादीविरुद्ध सोही ऐनको दफा ३ को उपदफा (१) अनुसार कैद र बिगोबमोजिम जरिवाना सजायको मागदाबी गरिएको छ।
