सरकारले सिफारिस गरेका तीन वटा अध्यादेश राष्ट्रपति कार्यालयमा दर्ता भएका छन्। बिहीबार साँझ ५ बजेतिर अध्यादेशहरू राष्ट्रपति कार्यालय पुगेका हुन्।
राष्ट्रपति कार्यालयका प्रवक्ता कृष्ण बहादुर शाहीका अनुसार प्राप्त अध्यादेश राष्ट्रपति रामचन्द्र पौडेलसमक्ष पेश गर्न भने बाँकी छ।
बुधबार बसेको मन्त्रिपरिषद् बैठकले भूमिसम्बन्धी केही नेपाल ऐनलाई संशोधन गर्ने, वनसम्बन्धी केही नेपाल ऐनलाई संशोधन गर्ने र विपद्सम्बन्धी केही नेपाल ऐनलाई संशोधन गर्ने अध्यादेश जारी गर्न राष्ट्रपतिसमक्ष सिफारिस गर्ने निर्णय गरेको थियो।
सरकारका प्रवक्ता सस्मित पोखरेलले भोटेकोशी बाढीलाई मध्यनजर गर्दै विपद्सम्बन्धी अध्यादेश जारी गर्न लागिएको बताएका छन्। यस अध्यादेशमा १२ वर्ष बेपत्ता भएका व्यक्तिलाई मृतक घोषणा गर्न सकिने हालको व्यवस्थालाई छोट्याएर विपद्को सन्दर्भमा ४५ दिनमै मृतक घोषणा गर्न सकिने प्रावधान राखिएको छ।
यस्तै, भूमिसम्बन्धी अध्यादेशमा भूमिहीन दलित, सुकुम्बासी र अव्यवस्थित बसोबासीलाई जग्गा दिने विषय समावेश छ।
राष्ट्रपतिले जारी गरेपछि मात्रै यी अध्यादेशहरूले गरेका व्यवस्था लागू हुनेछन्। संघीय संसदको अधिवेशन नभएको अवस्थामा तत्काल कानुन बनाउनुपर्ने भएमा मन्त्रिपरिषद्को सिफारिसमा राष्ट्रपतिले अध्यादेश जारी गर्न सक्ने संवैधानिक व्यवस्था छ।
यसअघि: सरकारले राष्ट्रपति रामचन्द्र पौडेलसमक्ष तीन अध्यादेश जारी गर्न सिफारिस
