संयुक्त राज्य अमेरिकाकी सार्वजनिक कूटनीतिसम्बन्धी उपविदेशमन्त्री सारा बी. रोजर्सले नेपाल अमेरिकाको महत्वपूर्ण साझेदार मुलुक रहेको र द्विपक्षीय सम्बन्ध तथा सहकार्यलाई अझ विस्तार गर्न अमेरिका प्रतिबद्ध रहेको बताइन्।
सोमबार काठमाडौंमा सञ्चारकर्मीसँगको अन्तरक्रियामा उनले ५५ करोड अमेरिकी डलरको मिलेनियम च्यालेन्ज कर्पोरेसन (एमसिसी) कम्प्याक्टलाई नेपालको ऊर्जा र आर्थिक विकासका लागि महत्वपूर्ण लगानी परियोजनाको रूपमा व्याख्या गरिन्। उक्त परियोजनाले नेपाल–अमेरिका साझेदारीलाई थप बलियो बनाउने विश्वास उनले व्यक्त गरिन्।
रोजर्सका अनुसार गत वर्ष १ लाख १२ हजार अमेरिकी पर्यटकले नेपाल भ्रमण गरेका थिए। अमेरिका नेपालको दोस्रो ठूलो पर्यटक स्रोत बजार हो। पर्यटन क्षेत्रले दुई देशबीचको सम्बन्धलाई नजिक बनाएको उनले उल्लेख गरिन्।
नेपालमा नवप्रवर्तन, लगानी र आर्थिक वृद्धिका प्रशस्त सम्भावना रहेको बताउँदै उनले व्यवसायिक तथा लगानीमैत्री वातावरण सुदृढ भए अमेरिकी कम्पनीहरू नेपालका लागि महत्वपूर्ण साझेदार बन्न सक्ने धारणा राखिन्।
नेपालको सार्वभौमसत्ता, आर्थिक विकास र साझा समृद्धिलाई प्रवर्द्धन गर्न नेपाल सरकार र नेपाली जनतासँगको सहकार्यलाई अझ मजबुत बनाउने अमेरिकी प्रतिबद्धता दोहोर्याउँदै उनले दीर्घकालीन साझेदारीलाई प्राथमिकतामा राखिएको स्पष्ट पारिन्।
भ्रमणका क्रममा आफूले परराष्ट्रमन्त्री शिशिर खनाल तथा सञ्चार तथा सूचना प्रविधिमन्त्री डा. विक्रम पाण्डेसँग भेटवार्ता गरेको जानकारी दिँदै रोजर्सले आर्थिक सम्बन्ध विस्तार, व्यापारिक वातावरण सुधार र डिजिटल पहुँच वृद्धिका विषयमा सार्थक छलफल भएको बताइन्।
