कैलालीको टीकापुरमा तालिमका क्रममा बेहोस भएका ६ जना सशस्त्र प्रहरी जवानलाई उपचारका लागि काठमाडौं ल्याइएको छ। उनीहरूलाई नेपाली सेनाको स्काई ट्रकमार्फत दिउँसो पौन २ बजे काठमाडौं पठाइएको हो।
यसअघि बेहोस भएका जवानहरूलाई कैलालीबाट सुर्खेत लगिएको थियो। टीकापुरस्थित सशस्त्र प्रहरी बल नेपाल राजश्व तथा औद्योगिक तालिम शिक्षालयमा जवान आधारभूत तालिमका क्रममा सात जना जवान बेहोस भएका थिए।
स्रोतका अनुसार दुई सय मिटर दौडका क्रममा उनीहरू अचानक बेहोस् भएका थिए। बेहोस हुनेहरूमा बलबहादुर बस्नेत, गणेश रावत, मनबहादुर बस्नेत, चिनबहादुर थामी, किरननाथ योगी, धिरज थापा, सुरेश शाही र भूपेन्द्र बस्नेत रहेका छन्।
सशस्त्र प्रहरीका सहप्रवक्ता तथा डीएसपी शैलेन्द्र थापाले ६ जनालाई काठमाडौं ल्याइएको र एक जनाको अवस्था सामान्य रहेको बताए।
