रुकुम सोतीमा अन्तरजातीय प्रेमकै कारण ज्यान गुमाएका नवराज विकसहित ६ जना युवाको न्याय र सम्मानको माग गर्दै काठमाडौंको माइतीघरमा विद्रोह प्रदर्शन भएको छ। जात व्यवस्थाले निम्त्याएको उत्पीडन, शृंखलाबद्ध हत्या र ऐतिहासिक थिचोमिचोविरुद्ध यो प्रतिरोध भएको हो।
जात व्यवस्था उन्मूलन मोर्चा नेपाल प्रथम राष्ट्रिय सम्मेलन आयोजक समितिको संयोजनमा भएको प्रदर्शनमा देशैभरबाट उत्पीडित नागरिक, बौद्धिक समुदाय र मानवअधिकारकर्मी सहभागी थिए। यो विद्रोह दिवसको घोषणा छ वर्षअघि भएको सोती घटनाका पीडितको सम्मान र न्याय खोज्ने प्रतिरोधको रूपमा गरिएको थियो।
प्रदर्शनकारी युवा अधिकारकर्मीले ‘अन्तरजातीय प्रेमकै कारण ज्यान फाल्नुपर्ने यो देश कस्तो गणतन्त्र हो?’ भन्दै आक्रोश पोखे। उनीहरूले ‘हाम्रो श्रम चल्ने, रगत र पसिना चल्ने तर छोराले छोरी मन पराउँदा खोलामा बगाइने बर्बर जातिवादी मानसिकताको अन्त्य विना लोकतन्त्र अधुरो छ’ लेखिएका प्लेकार्ड बोकेका थिए।
प्रदर्शनमा भूमिहीन दलितलाई खेतीयोग्य जमिनको व्यवस्था, दलित विद्यार्थीका निम्ति छात्रवृत्तिसहित निःशुल्क शिक्षा सुनिश्चित र दलित हत्याकाण्डको न्यायिक छानबिन गर्न उच्चस्तरीय स्वतन्त्र आयोग गठनको माग प्रस्तुत गरियो।
