मन्त्रालय भागबण्डाको विवादले मधेस प्रदेशका मुख्यमन्त्री कृष्णप्रसाद यादव नेतृत्वको सरकार विश्वासको मत पाएको दुई दिनमै संकटमा परेको छ। गठबन्धन दलहरूबीच सहमति जुट्न नसक्दा सरकार अल्पमतमा पर्ने देखिएको छ।
सरकारलाई समर्थन गरेका जनता समाजवादी पार्टी (जसपा) नेपाल र जनमत पार्टी बाहिरिएपछि मुख्यमन्त्री यादवले नेकपा एमाले, नेपाली कांग्रेस र नेकपा (माओवादी केन्द्र) को समर्थनमा जेठ ८ गते विश्वासको मत प्राप्त गरेका थिए। यसअघि प्रतिपक्षमा रहेको एमाले, जसपा र जनमत पार्टी बाहिरिएपछि सरकारमा सहभागी भएको थियो।
पुनर्गठित मन्त्रिपरिषद्मा नेकपाले अर्थ मन्त्रालय दाबी गरेपछि विवाद बढेको स्रोतले बताएको छ। ‘नेकपाले अर्थमन्त्रीमा दाबी गरेको छ, तर मुख्यमन्त्रीले अर्थ एमालेलाई दिने सहमति भएको बताएपछि स्थिति गम्भीर देखिन्छ,’ स्रोतले भन्यो।
नेकपाका एक सांसदका अनुसार सरकारबाट बाहिरिने कि नबाहिरिने भन्ने विषयमा पार्टीभित्र आन्तरिक छलफल भइरहेको छ। ‘हामी आन्तरिक छलफलमै छौँ। पार्टी संयोजक पुष्पकमल दाहाल प्रचण्डसँग पनि सल्लाह भइरहेको छ,’ उनले भने, ‘अहिले केही भन्न सकिँदैन।’
मुख्यमन्त्री यादवलाई एमालेका २४, कांग्रेसका २२, नेकपाका १५ र नेपाल सङ्घीय समाजवादी पार्टीका एक सांसद गरी ६२ जनाले विश्वासको मत दिएका थिए। प्रदेश सभामा बहुमतका लागि ५१ सांसदको समर्थन आवश्यक पर्छ। यदि नेकपा सरकारबाट बाहिरिएको खण्डमा मुख्यमन्त्री यादव नेतृत्वको सरकार ढल्ने निश्चित छ। नेकपा बाहिरिएमा कांग्रेस र एमालेको मात्र ४६ मत हुनेछ।
