भोजपुरको रामप्रसाद राई गाउँपालिका–८ खोक्सिकका किसानले आम्दानी बढाउने उद्देश्यले व्यावसायिक अदुवाखेतीमा जोड दिन थालेका छन्। परम्परागत खेती प्रणालीबाट सीमित आम्दानी हुने भएपछि उनीहरूले अदुवालाई वैकल्पिक र आम्दानीमुखी बालीका रूपमा अँगालेका हुन्।
स्थानीय सरकार र गुराँस सहकारी संस्थाले किसानलाई व्यावसायिक अदुवाखेतीमा लाग्न प्रोत्साहन गरिरहेको छ। वडाध्यक्ष बाचकुमार राईका अनुसार, आठ जना किसानले यस सहकारीमा आबद्ध भएर व्यावसायिक रुपमा अदुवाखेती गरिरहेका छन्।
वडाध्यक्ष राईले भने, “हामीले व्यावसायिक अदुवा खेतीमा जोड दिएका छौँ। खेती गर्न इच्छुक किसानलाई स्थानीय सरकारले पनि आवश्यक सहयोग गरेको छ। किसानलाई अनुदानमा अदुवाको बीउ वितरण गरेका छौँ।”
स्थानीय किसान मनोज राईका अनुसार, आवश्यक अनुदान सहयोग, कृषि ज्ञान, तालिम र प्राविधिक सहयोग उपलब्ध भएकाले अदुवाखेतीमा लाग्न सहज भएको छ।
किसान कमल राईले परम्परागत बालीको तुलनामा अदुवाखेतीबाट राम्रो आम्दानी हुने गरेको बताए। अझ, बाँदरले अन्य बालीको तुलनामा अदुवालाई कम क्षति पुर्याउने भएकाले किसान यस खेतीको विस्तारमा जुटेको उनको भनाइ छ।
स्थानीय किसान देवकुमार राईले व्यक्तिगत तथा सामूहिक रूपमा अदुवाखेती विस्तार भइरहेको जानकारी दिए। उनले आफूले हाल करिब तीन रोपनी क्षेत्रमा अदुवा विस्तार गरेको बताए।
खोक्सिक क्षेत्रलाई अदुवा उत्पादनको सम्भावनायुक्त क्षेत्रका रूपमा विकास गर्ने लक्ष्यसहित स्थानीय तहले अदुवाखेतीको विस्तारसँगै प्रशोधन, भण्डारण र बजारीकरणमा समेत जोड दिने योजना बनाएको छ।
