सुर्खेतको भेरीगंगा नगरपालिकास्थित साजगोठेरी सामुदायिक वन उपभोक्ता समूहका तत्कालीन अध्यक्ष लोकबहादुर महतारासहित तीन जनाविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको छ। उनीहरूमाथि सार्वजनिक सम्पत्तिमा हानि पुर्याएको आरोप छ।
आयोगले दायर गरेको मुद्दामा वन उपभोक्ता समितिका पदाधिकारीले आर्थिक वर्ष २०७८/०७९ मा रुख कटान गरी बिक्री गर्दा रकम हिनामिना गरेको उल्लेख छ।
तत्कालीन अध्यक्ष महतारा, सचिव मानकुमारी पौड्याल र कोषाध्यक्ष दलबहादुर बुढाको मिलेमतोमा अनियमितता भएको आयोगको ठहर छ।
प्रत्येकविरुद्ध सात लाख १५ हजार नौ सय १९ रुपैयाँ बिगो कायम गरिएको छ। आयोगले बिगोबमोजिम जरिवाना र कैद सजायको माग गरेको छ।
