सम्पत्ति शुद्धीकरण मुद्दामा व्यवसायी दीपक भट्ट र सुलभ अग्रवाललाई विशेष अदालतले पुर्पक्षका लागि थुनामा पठाउने आदेश दिएको छ। अदालतको आदेशसँगै उनीहरूलाई डिल्लीबजार कारागार चलान गरिएको छ।
विशेष अदालतका अध्यक्ष सुदर्शनदेव भट्ट, सदस्य उमेश कोइराला र विदुर कोइरालाको इजलासले थुनछेक बहस सकिएपछि उनीहरूलाई थुनामा पठाउने आदेश दिएको हो। यो मुद्दामा अब थप न्यायिक प्रक्रिया थुनामै बसेर अघि बढ्नेछ।
उक्त मुद्दामा भट्टलाई २६ अर्ब ६३ करोड २७ लाख ७१ हजार ५९ रुपैयाँ र अग्रवाललाई २५ अर्ब ५९ करोड २० लाख ६ हजार १२४ रुपैयाँ बिगो कायम गरिएको थियो। मुद्दाका ३९ प्रतिवादीमध्ये ३४ जना व्यक्ति र ५ वटा कम्पनी संलग्न रहेको स्रोतले जनाएको छ।
प्रहरीले भट्टलाई चैत १९ गते र अग्रवाललाई चैत २२ गते सम्पत्ति शुद्धीकरण मुद्दाको अनुसन्धानका लागि पक्राउ गरेको थियो। अदालतले अग्रवालको स्वास्थ्योपचारको व्यवस्था गर्न पनि आदेशमा उल्लेख गरेको छ।
