काठमाडौं महानगरपालिकाले आगामी आर्थिक वर्ष २०८३/८४ का लागि २५ अर्ब ८८ करोड ३० लाख ५५ हजार रुपैयाँको अनुमानित बजेट नगर सभामा पेश गरेको छ। कार्यवाहक मेयर सुनिता डंगोलले बिहीबार आयोजित नगर सभामा बजेट तथा कार्यक्रमसँगै आर्थिक विधेयक र विनियोजन विधेयक समेत प्रस्तुत गरिन्।
महानगरपालिकाले आगामी वर्षको नीति तथा कार्यक्रम कार्यान्वयन गर्न कुल बजेटमध्ये २५ अर्ब १३ करोड ३० लाख ५५ हजार रुपैयाँ सञ्चित कोषमा व्ययभार पर्ने र ७५ करोड रुपैयाँ अन्य बाह्य व्ययभार हुने गरी स्रोतको व्यवस्थापन गरेको छ।
कुल बजेटमध्ये २० अर्ब १८ करोड ६३ लाख आन्तरिक आय र बैंक मौज्दातबाट बेहोरिनेछ। ४ अर्ब ९३ करोड ६७ लाख रुपैयाँ केन्द्र र प्रदेश सरकारको अनुदानबाट प्राप्त हुनेछ।
यो बजेट चालु आर्थिक वर्षको तुलनामा ७७ करोड रुपैयाँ बढी हो। बजेटमा पूर्वाधार विकासलाई १५ अर्ब ३१ करोड रुपैयाँ विनियोजन गरिएको छ।
