सङ्खुवासभामा सिँचाइ सुविधाको अभावले असार अन्त्यसम्म २५ प्रतिशत मात्र धान रोपाइँ भएको छ। पर्याप्त पानी नपर्दा र सिँचाइ प्रबन्ध नहुँदा किसानहरू चिन्तित छन्।
जिल्ला कृषि ज्ञान केन्द्रका सूचना अधिकारी सरोज राईका अनुसार, माथिल्लो क्षेत्रमा रोपाइँ सकिए पनि तल्लो बेँसी भेगमा बीउ ब्याडमै सुकेका छन्। जिल्लामा आठ हजार ६०० हेक्टरमा धानखेती हुन्छ। कुल खेतीयोग्य जमिन ३१ हजार ५९६ हेक्टर छ।
खाँदबारी नगरपालिकाका सेकाहा, पाङ्मा, मरुवा, हेलुवाबेँसी, चन्दनपुर, चेवाबेँसी, कल्चेबेँसी, पाङ्ठाबेँसी, पिप्लेबेँसी, माल्टाबेँसी क्षेत्रमा धानखेती हुन्छ। मादी र धूपू क्षेत्र धान उत्पादनका लागि चिनिन्छन्। मकालु गाउँपालिकाको हेदाङगना, पाँचखपन नगरपालिकाको वाना र होक्से तथा चैनपुर नगरपालिकाको भण्डारीडाँडामा पनि धानखेती गरिन्छ। यहाँ अट्टे, बेलगुठी, खुमलचार, राधाकृष्ण, सानोमसिना, कालधान जातका धान फल्छन्।
यसैबीच, सङ्खुवासभा प्रशासनले हुलाकबाट राहदानी घरघर पुर्याउने अभियान सुरु गरेको छ। तीन महिनामा ११० जनाले यो सेवा लिएका छन्। सरकारी सेवा घरदैलोमा पुर्याउने लक्ष्यअनुसार अभियान चलेको हो।
सहायक प्रमुख जिल्ला अधिकारी सुमनकुमार कार्कीले सेवाग्राहीको राहदानी कार्यालयबाट लिएर हुलाकमार्फत पठाइएको बताए। यसले कार्यालय धाउने झन्झट, समय र खर्च बचाएको छ। सेवाग्राहीले हुलाक शुल्कबापत रु ५५ को टिकट खर्च बेहोर्नुपर्छ।
भौगोलिक विकटता र सडक सञ्जाल नपुगेका ग्रामीण क्षेत्रका ज्येष्ठ नागरिक, महिला, विद्यार्थी तथा वैदेशिक रोजगारीमा जान चाहने युवाहरूका लागि यो अभियान उपयोगी हुने जिल्ला हुलाक कार्यालयका प्रमुख अशोक राईले बताए।
